Read kinyarwanda Zaburi 49 Bible Online

Zaburi 49 - kinyarwanda bible

Zaburi 49

¹[57] Igenewe umuririmbisha. Ni zaburi y’abahungu ba Kore.

²Nimwumve ibyo ngiye kuvuga, miryango mwese, nimutege amatwi, mwumve neza, abatuye isi mwese,

³rubanda rugufi namwe abakomeye, abakire namwe abakene, mbese mwese uko mungana!

⁴Umunwa wanjye ugiye kuvuga amagambo y’ubuhanga, n’umutima wanjye uzirikane ibiboneye.

⁵Amatwi yanjye ahugukiye kumva umugani, igiteye inkeke ngisobanuze umurya w’inanga.

⁶Ni kuki nagira ubwoba mu minsi mibi, ngatinya ubugome bw’inyaryenge zinkikije,

⁷cyangwa abantu biringira ubukungu bwabo, maze bakiratana ko batunze byinshi?

⁸Nta muntu n’umwe wabitanga ngo bimucungure, cyangwa ngo abihe Imana bimubere ingwate.

⁹N’uwatanga ibingana bite ngo agure ubuzima, namenye ko amaherezo buzazima burundu.

¹⁰None se hari uwabaho ubuziraherezo, akaguma aho adateze kujya mu mva?

¹¹Mbese ntimuhora mubona uko urupfu rutwara abanyabwenge, kimwe n’uko ruhitana umusazi n’umupfayongo, maze ibintu bari bafite bikaribwa n’abandi?

¹²Mu mva ni ho bazatura imyaka n’imyaka, maze abe ari ho baguma ubuziraherezo, kabone n’ubwo biyitiriye imisozi yabo.

¹³Koko umuntu woga mu bukire ntamara kabiri; amera nk’itungo ryanogotse.

¹⁴Ngayo amaherezo y’abiyemera, n’ay’abanyurwa n’ibyo bivugaho. (guceceka akanya gato)

¹⁵Babyagiye ikuzimu nk’intama mu gikumba; Nyirarupfu akaba ari we ubashorera abajyana mu rwuri, maze bwacya, abantu b’intungane bakabagenda hejuru; isura bahoranye ikayokera ikuzimu, bazabe ari ho batura iteka.

¹⁶Naho jyewe, Imana yiyemeje kundokora, no kungobotora ku ngoyi z’ikuzimu! (guceceka akanya gato)

¹⁷Ntibikagukange rero nubona umuntu abaye umukire, n’ubwamamare bwe bukagenda bwiyongera;

¹⁸kuko umunsi yapfuye, nta na kimwe azajyana ikuzimu, n’icyubahiro yari afite ntazakimanukana iyo ngiyo.

¹⁹Akiriho yajyaga yirya icyara, akishimagiza, ati «Dore barakurata, kuko byose byaguhiriye!»

²⁰Nyamara ntazabura kujya aho abakurambere be bagiye, bo batazongera kubona izuba ukundi!

²¹Koko umuntu woga mu bukire ntamara kabiri, amera nk’itungo ryanogotse!