Read kinyarwanda Zaburi 51 Bible Online

Zaburi 51 - kinyarwanda bible

Zaburi 51

¹[59] Igenewe umuririmbisha. Ni zaburi iri mu zo bitirira Dawudi.

²Yerekeranye n’ibyabaye igihe umuhanuzi Natani amusanze iwe, Dawudi amaze gusambanya Betsabe.

³Mana yanjye, ngirira imbabazi ukurikije ineza yawe; kubera impuhwe zawe nyinshi, umpanagureho ibyaha byanjye.

⁴Nyuhagiraho wese ibicumuro byanjye, maze unkize icyaha nakoze.

⁵Koko nemeye ibicumuro byanjye, icyaha cyanjye kimpora imbere.

⁶Uwo nacumuyeho ni wowe wenyine, maze ikibi wanga, mba ari cyo nkora! None rero, nubintonganyiriza ntuzaba undenganya, n’urubanza uzancira ntirugira amakemwa.

⁷Dore jyeweho navutse ndi umunyabyaha, kandi mama yansamanye igicumuro.

⁸Naho wowe ukunda umuntu utaryarya, maze ubushishozi ukabunyigishiriza mu mutima wanjye.

⁹Ntera icyuhagiro, nkire ubwandu bwose, unyuhagire, maze nererane kurusha amasimbi.

¹⁰Ongera unyumvishe impundu z’ibyishimo n’umunezero, maze amagufwa wajanjaguye ahimbarwe.

¹¹Renza amaso ibyaha nakoze, ibicumuro byanjye byose ubimpanagureho.

¹²Mana yanjye, ndemamo umutima usukuye, maze umvugururemo ibitekerezo biboneye.

¹³Ntunyirukane ngo unte kure yawe, cyangwa ngo unkuremo umwuka wawe uzira inenge;

¹⁴ahubwo mpa kwishimira ko nakijijwe, kandi unkomezemo umutima wuje ineza.

¹⁵Abagome nzabatoza inzira yawe, n’abanyabyaha bakugarukire.

¹⁶Mana yanjye, Mana ikiza, nkura mu nzigo ndimo, maze ururimi rwanjye ruzamamaze ubutungane bwawe.

¹⁷Nyagasani, bumbura umunwa wanjye, maze akanwa kanjye gatangaze ibisingizo byawe.

¹⁸Igitambo cyanjye si cyo ushaka, n’aho nagutura igitwikwa, nticyakunezeza.

¹⁹Ahubwo igitambo Imana ishima, ni umutima washengutse. Mana yanjye, ntuzirengagize umutima washegeshwe kandi wihana!

²⁰Ku mpuhwe zawe, girira neza Siyoni, maze wubake bundi bushya inkike za Yeruzalemu.

²¹Ni bwo rero uzashima ibitambo byategetswe, ibitwikwa hamwe n’ibiturwa burundu, maze bazaturire ibimasa ku rutambiro rwawe.