Read kinyarwanda Zaburi 52 Bible Online

Zaburi 52 - kinyarwanda bible

Zaburi 52

¹[60] Igenewe umuririmbisha. Ni inyigisho mu zo bitirira Dawudi.

²Yerekeye iby’igihe Dowegi, Umunyedomu, aje kumenyesha Sawuli ko Dawudi yahungiye mu rugo rwa Ahimeleki.

³Kuki wiratana kuba umugizi wa nabi, wa ngirwamugabo we, kandi Imana yo ihorana ineza?

⁴Ururimi rwawe rwuzuye ubugome, rwica nabi nk’urwembe rutyaye, rukagira amayeri menshi yo kubeshya.

⁵Wikundira ikibi kurusha icyiza, ugakunda ikinyoma aho kuvuga ukuri. (guceceka akanya gato)

⁶Uri karimi kabi, nta kindi wikundira atari amagambo asebanya gusa!

⁷Imana ubwayo izagukuraho buheriheri, izagushikanura, iguhubure mu nzu yawe, maze izakurandure ku isi y’abazima. (guceceka akanya gato)

⁸Nuko ab’intungane nibabibona, bashye ubwoba, hanyuma baguhe urw’amenyo, bavuga

⁹bati «Dore wa muntu wiyise intwari, akanga ko Imana imubera ubuhungiro butavogerwa, ahubwo akiringira ubukungu bwinshi yari afite, akiratana ibikorwa by’ubugome bwe!»

¹⁰Naho jyewe, ak’umuzeti watohagiriye mu Ngoro y’Imana, mpora nizigiye ubuntu bwayo!

¹¹Iteka ryose nzahora ngushimira ibyo wakoze! Niringiye izina ryawe, kuko ryuje ineza, nzaryamamariza imbere y’abayoboke bawe.