Read kinyarwanda Zaburi 56 Bible Online

Zaburi 56 - kinyarwanda bible

Zaburi 56

¹[64] Igenewe umuririmbisha, ikaririmbwa nk’iyitwa «Inuma iri kure cyane». Iri mu zo bitirira Dawudi. Iririmbwa banihiriza ijwi. Yayihimbye igihe Abafilisiti bamufatiye i Gati.

²Mana yanjye, ngirira ibambe! Abanzi banjye barankurikiranye; umunsi wose bahora bandwanya, bakanyotsa igitutu.

³Umunsi wose ingenza zinyomaho, abandwanya ntibagira umubare, barandusha imbaraga.

⁴Igihe mfite ubwoba, ni wowe niringira.

⁵Niringira Imana, ari na ko ndata ijambo ryayo, nkiringira Imana, maze simbe nagira ubwoba: ubwo se muntu buntu yashobora kuntwara iki?

⁶Umunsi wose birirwa bambabaza, nta kindi batekereza atari ukungirira nabi.

⁷Baca ibico, bakangenza, baronda aho nyuze hose, kugira ngo bamvutse ubugingo.

⁸Ku mpamvu y’ubwo bugome bwabo, bashobora bate guhonoka? Mana yanjye, uburakari bwawe nibukureho bene abo bantu!

⁹Imiburagiro yanjye ni wowe uyizi; tega urwabya rwawe, amarira yanjye ahongobokeremo. None se si ko byanditse mu gitabo cyawe?

¹⁰Abanzi banjye bazakubana bahunga, umunsi nagutabaje. Ndabizi Imana iri kumwe nanjye!

¹¹Niringira Imana, ari na ko ndata ijambo ryayo, niringira Uhoraho, ari na ko ndata ijambo rye,

¹²niringira Imana, maze simbe nagira ubwoba; ubwo se abantu bashobora kuntwara iki?

¹³Mana yanjye, nkomeye ku masezerano nakugiriye; nzagutura ibitambo by’ibisingizo,

¹⁴kuko amagara yanjye wayakijije urupfu. None se ibirenge byanjye ntiwabirinze gutsikira, ugira ngo ngende imbere y’Imana mu rumuri rumurikira abazima?