Read kinyarwanda Zaburi 57 Bible Online

Zaburi 57 - kinyarwanda bible

Zaburi 57

¹[65] Igenewe umuririmbisha, ikaririmbwa nk’iyitwa «Witsemba». Iri mu zo bitirira Dawudi, bakayiririmba banihiriza ijwi. Yayihimbiye mu buvumo, igihe yahungaga Sawuli.

²Gira ibambe, Mana yanjye, ngirira ibambe, kuko ari wowe nashatseho ubuhungiro, maze nikinga mu gicucu cy’amababa yawe, kugeza igihe ibyago ndimo bizashirira.

³Ndatakambira Imana, Musumbabyose, Imana indengera muri byose.

⁴Aho iganje mu ijuru ninyoherereze icyankiza! Dore umuntu unsatiriye yatutse Imana, none na yo nigaragaze ineza n’ubudahemuka bwayo! (guceceka akanya gato)

⁵Dore ndyamye hagati y’abantu bameze nk’intare, zimiragura bene muntu! Amacumu n’imyambi, ni byo menyo yabo, inkota ityaye ikaba ururimi rwabo.

⁶Mana yanjye, garagaza ububasha bwawe busumbye ijuru, ikuzo ryawe ritumbagire hejuru y’isi yose!

⁷Mu nzira nyuramo, bahateze umutego: ariko narunamye ndawurokoka. Bari bacukuye urwobo imbere yanjye, none ni bo baruguyemo. (guceceka akanya gato)

⁸Mana yanjye, umutima wanjye wasubiye mu gitereko! Umutima wanjye wasubiye mu gitereko, none reka ndirimbe, ncurange ibyishongoro!

⁹Nti «Kanguka, shema ryanjye, kanguka, nanga y’imirya, nawe cyembe, maze nkangure umuseke!»

¹⁰Nyagasani, nzagusingiriza mu yindi miryango, ngucurangire rwagati mu mahanga;

¹¹kuko ineza yawe ikabakaba ku ijuru, n’ubudahemuka bwawe bugatumbagira mu bicu.

¹²Mana yanjye, garagaza ububasha bwawe busumbye ijuru, ikuzo ryawe ritumbagire hejuru y’isi yose!