Read kinyarwanda Zaburi 58 Bible Online

Zaburi 58 - kinyarwanda bible

Zaburi 58

¹[66] Igenewe umuririmbisha, ikaririmbwa nk’iyitwa «Witsemba». Iri mu zo bitirira Dawudi, bakayiririmba banihiriza ijwi.

²Banyabubasha, aho muvuga koko ibihuje n’ubutabera? Bana b’abantu, aho muca imanza mukurikije amategeko?

³Oya! Ahubwo mugira nabi nkana, mugakwiza ku isi urugomo ruterwa n’ibiganza byanyu.

⁴Ni abagiranabi bayobye bakiri mu nda ya ba nyina, bakaba n’abanyabinyoma barindagiye bakivuka!

⁵Ubumara bafite ni nk’ubumara bw’inzoka; bameze nk’impiri y’igipfamatwi, yica amatwi nkana,

⁶igira ngo itumva ijwi ry’umugombozi, n’ubwo yaba ari umugombozi w’umuhanga.

⁷Mana yanjye, menagura amenyo ari mu kanwa kabo, Uhoraho, kura imikaka y’izo ntare!

⁸Nibamere nk’amazi atemba, Imana nitamike imyambi yayo, maze bahinduke imirara!

⁹Nibamere nk’ikinyamujongo kigenda gishonga; nk’uko bigendekera ikirambu, na bo ntibakabone izuba!

¹⁰Uburakari bw’Imana nibwihutire kubatsemba, kurusha uko umuriro utwika inkwi z’amahwa.

¹¹Naho intungane izashimishwa no kubona uko ihorewe, yogereze ibirenge byayo mu maraso y’abagiranabi.

¹²Maze rubanda bazavuge bati «Koko ubusugire bw’intungane bubaho, kandi hariho Imana ica imanza ku isi!»