Read kinyarwanda Zaburi 59 Bible Online

Zaburi 59 - kinyarwanda bible

Zaburi 59

¹[67] Igenewe umuririmbisha, ikaririmbwa nk’iyitwa «Witsemba». Iri mu zo bitirira Dawudi, bakayiririmba banihiriza ijwi. Yayihimbye igihe Sawuli yohereje abantu ngo bagote urugo rwe bamwice.

²Mana yanjye, nkiza abanzi banjye, undinde abaje kuntera.

³Nkiza abagiranabi, unkure mu maboko y’abantu b’imenamaraso.

⁴Koko rero ngaha baciye igico ari jye bibasiye, Uhoraho, dore abanyamaboko bakoraniye kuntera, kandi nta kosa nta n’icyaha nakoze!

⁵Nta kibi cyangaragayeho, ariko dore bahururiye kuntega. Kanguka, uze aho ndi wirebere nawe,

⁶wowe Uhoraho, Mugaba w’ingabo, Mana ya Israheli! Kanguka, uhe ibihano ariya mahanga yose; abo bagambanyi b’abagiranabi, ntugire n’umwe ubabarira! (guceceka akanya gato)

⁷Nimugoroba bagaruka bakankama nk’imbwa, bakazenguruka umugi wose.

⁸Dore ngabo! Urwasaya rwabo rwuzuye urukonda, bafite inkota ku binwa byabo. Mbese hari ubumva?

⁹Wowe, Uhoraho, urabaseka, abo banyamahanga bose ukabahinyura!

¹⁰Mbaraga zanjye, ni wowe ndangamiye, Imana ni yo buhungiro bwanjye butavogerwa.

¹¹Imana yuje ineza irangoboka, maze ikampa guhinyura abanyubikiye bose.

¹²Wihutiraho ngo ubice, ejo umuryango wanjye utava aho ubyibagirwa, ahubwo imbaraga zawe nizibatigise, zibacishe bugufi, Nyagasani, ngabo yacu nikingira!

¹³Iyo babumbuye umunwa gusa, bahita bagwiza ibyaha: bazahanirwe ubwirasi bwabo, ku mpamvu y’imivumo n’ibinyoma bakwiza!

¹⁴Batsembane ubukana, ntihagire n’umwe uhonoka, maze bamenye ko Imana ari yo iganje mu gihugu cya Yakobo, kugeza ku mpera z’isi. (guceceka akanya gato)

¹⁵Nimugoroba bagaruka bakankama nk’imbwa, bakazenguruka umugi wose,

¹⁶bakawuzerera bashaka ibyo barya; baba batijuse, bagakesha ijoro baboroga.

¹⁷Jyeweho ndarata imbaraga zawe, nkamamaza ineza yawe kuva mu gitondo, kuko wambereye umurwa w’amakiriro, n’ubuhungiro ku munsi w’amage.

¹⁸Nzagucurangira, wowe mbaraga zanjye, wowe Mana imbereye umurwa w’amakiriro, wowe Mana yuje ineza!