Read kinyarwanda Zaburi 62 Bible Online

Zaburi 62 - kinyarwanda bible

Zaburi 62

¹[71] Igenewe umuririmbisha. Yahimbwe bakurikije Yedutuni. Ni zaburi iri mu zo bitirira Dawudi.

²Imbere y’Imana yonyine, umutima wanjye ni ho ugubwa neza; agakiza kanjye, ni yo gakomokaho.

³Ni yo yonyine rutare rwanjye n’agakiza kanjye; ni yo buhungiro butavogerwa: sinteze guhungabana.

⁴Muzahereza hehe kwiroha mwese ku muntu umwe, kugira ngo mumwese hasi, agwe nk’urukuta rwari rusanzwe ruhengamye, cyangwa nk’inkike yari isanzwe inyeganyega?

⁵Imigambi yabo ni iyo kumuziza umwanya arimo, bagahimbazwa no kumubeshyera gusa; ku rurimi ugasanga bavuga amagambo y’umugisha, nyamara mu mitima yabo haganje imivumo. (guceceka akanya gato)

⁶Mutima wanjye, shakira amahoro iruhande rw’Imana yonyine, kuko amiringiro yanjye yose ari yo akomokaho.

⁷Ni yo yonyine rutare rwanjye n’agakiza kanjye, ni yo buhungiro butavogerwa, sinteze guhungabana.

⁸Agakiza kanjye n’ishema ryanjye mbikesha Imana; ni yo rutare rudahangarwa n’ubuhungiro bwanjye.

⁹Rubanda mwese, nimuyiringire igihe cyose, muyibwire ikibari ku mutima; rwose Imana ni yo buhungiro bwacu! (guceceka akanya gato)

¹⁰Koko bene muntu ni nk’umwuka ushira ako kanya, n’ab’ibikomerezwa ni ubusabusa; bose hamwe ubashyize ku munzani, wasanga umwuka ubarusha kuremera.

¹¹Ntimukiringire gutwaza igitugu, ngo muhihibikanire kunyaga iby’abandi. Ubukungu nibwiyongera, ntimukabuzirikeho umutima wanyu!

¹²Hari ikintu kimwe Imana yavuze, na bibiri numvise, ari byo by’ibi: icya mbere ni uko ububasha bwose ari ubw’Imana,

¹³koko, Nyagasani, ineza yose ni wowe iturukaho, ikindi ni uko uhemba buri muntu ukurikije ibikorwa bye.