Read kinyarwanda Zaburi 63 Bible Online

Zaburi 63 - kinyarwanda bible

Zaburi 63

¹[72] Ni zaburi iri mu zo bitirira Dawudi; yayihimbye igihe yari mu butayu bwa Yuda.

²Nyagasani, ni wowe Mana yanjye, mpora ngushaka uko bukeye! Umutima wanjye ugufitiye inyota, n’umubiri wanjye ukakugirira urukumbuzi, meze nk’ubutaka bw’agasi, bwabuze amazi bukumirana.

³Naguhanze amaso aho uri mu Ngoro ntagatifu, mbona ububasha bwawe n’ikuzo ryawe;

⁴ineza yawe nsanga yaguranwa amagara y’umuntu, umunwa wanjye uhora ukwamamaza.

⁵Koko nzahora ngusingiza igihe cyose nkiriho, izina ryawe nditegere amaboko nkwiyambaza.

⁶Nzamera nk’umuntu wahaze ibinure n’imisokoro, ibitwenge bimpore ku munwa kubera ibyishimo, maze ndirimbe nezerewe kubera ibisingizo byawe.

⁷Iyo ngutekerereje aho ndyamye, mara amasaha ngusenga,

⁸kuko utahwemye kuntabara, nzavugiriza impundu aho nibereye mu gicucu cy’amababa yawe.

⁹Nkwizirikaho n’umutima wanjye wose, ukuboko kwawe kw’indyo kukandamira.

¹⁰Abibasiye rero amagara yanjye ngo bampitane, barakarimbuka ari bo, barindimukire ikuzimu mu nda y’isi !

¹¹Baragashirira ku bugi bw’inkota, bahinduke ibiryo by’ingunzu.

¹²Nuko umwami azanezezwe n’Imana: uzamurahira wese bizamuhesha ishema, naho akanwa k’abanyabinyoma kazibe.