Read kinyarwanda Zaburi 64 Bible Online

Zaburi 64 - kinyarwanda bible

Zaburi 64

¹[73] Igenewe umuririmbisha. Ni zaburi iri mu zo bitirira Dawudi.

²Mana yanjye, umva amaganya yanjye, urinde amagara yanjye umwanzi gica;

³umpishe kure y’abicanyi bangambanira, kure y’abagizi ba nabi bahuje umugambi.

⁴Dore batyaje indimi zabo boshye inkota, batamika imyambi yabo, ari yo magambo asesereza bavuga,

⁵kugira ngo barase rwihishwa umuntu w’indakemwa, ngo bamurase bamutunguye nta cyo bishisha.

⁶Bahirimbanira kunguka inama mbi, bagahimba amayeri yo guhisha imitego bamutega, bavuga bati «Ni nde uzabimenya?»

⁷Buzuriza hamwe imigambi y’ubugizi bwa nabi, bakigamba bavuga bati «Ibyo dushaka kugeraho turabinogeje rwose; burya mu nda ni kure, umutima w’umuntu ntugerwaho!»

⁸Ariko Imana yagize itya irabarasa, umwambi irekuye ubagwa gitumo, urabakomeretsa!

⁹Ururimi rwabo ni rwo rubahindutse, maze ubabonye wese akazunguza umutwe.

¹⁰Koko, umuntu wese byamukuye umutima, yamamaza ibyo Imana yakoze, kandi na we yumviraho.

¹¹Intungane niyishimire Uhoraho, imushakeho ubuhungiro, abafite umutima uboneye bose babyishimire.