Read kinyarwanda Zaburi 65 Bible Online

Zaburi 65 - kinyarwanda bible

Zaburi 65

¹[74] Igenewe umuririmbisha. Ni zaburi iri mu zo bitirira Dawudi. Ni indirimbo.

²Mana iri i Siyoni, abantu bakwiye kugusingiza, kandi bakarangiza imihigo bakugiriye.

³Wowe wumva isengesho bakubwiye, abantu bose baza bakugana.

⁴Ibyaha bikunda kutuganza, ariko wowe ukabitubabarira.

⁵Hahirwa umutumirwa wihitiyemo ubwawe; ukamuha kwigumira mu bikari by’Ingoro yawe. Tuzahazwa ibyiza byo mu rugo rwawe, ibintu bitagatifu byo mu Ngoro yawe.

⁶Mu butungane bwawe, uratwumva ukadukorera ibitangaza, wowe, Mana Mukiza wacu, mizero ya bose kugeza ku mpera z’isi, no ku batuye ibirwa byo mu nyanja za kure cyane.

⁷Ububasha bwawe bushyigikira imisozi, ugakindikiza ubutwari,

⁸ugahosha urusaku rw’inyanja, urusaku rw’imivumba yazo, ukanacubya imyivumbagatanyo y’ibihugu.

⁹Ku nkiko z’isi baratangarira ibimenyetso werekana, ab’iburasirazuba n’iburengerazuba wabateye kuvuza impundu.

¹⁰Wasuye isi, uyuhira amazi, maze uyigwizamo uburumbuke butagira ingano. Imigezi y’Imana isendereye amazi, maze ugategurira abantu imyaka ibatunga. Dore uko utegura ubutaka:

¹¹uyobora amazi mu mayogi, ugasanza amasinde, ukagusha imvura y’umurindi ngo ibworoshye, maze ugaha umugisha imbuto zimeramo.

¹²Umwaka uwusoza uwuhunda ibyiza byawe, aho unyuze hose hagasigara uburumbuke buteye ubwuzu.

¹³Ubwatsi bw’amatungo, buratohagira mu butayu, utununga ugasanga duteye ubwuzu,

¹⁴inzuri zikanyanyagiramo amashyo arisha, n’imibande ikazimagizwa n’imyaka yeze. Nuko byose bigasabagizwa n’ibyishimo, bikaririmba.