Read kinyarwanda Zaburi 66 Bible Online

Zaburi 66 - kinyarwanda bible

Zaburi 66

¹[75] Igenewe umuririmbisha. Ni indirimbo. Ni zaburi. Mahanga yose, nimusingize Imana,

²muririmbe ikuzo ry’izina ryayo, muyikuze muvuga ibisingizo byayo.

³Nimubwire Imana muti «Mbega ibikorwa byawe ngo biratera ubwoba! Abanzi bawe bageze aho kuguhakwaho kubera ububasha bwawe bukaze.

⁴Abatuye isi bose bapfukamye imbere yawe, bakagucurangira baririmba izina ryawe!» (guceceka akanya gato)

⁵Nimuze mwirorere ibikorwa by’Imana, yo abantu batinyira imyato:

⁶yahinduye inyanja ubutaka bwumutse, n’uruzi barwambuka ku maguru rwakamye kare; ni yo mpamvu tuyigirira ibirori.

⁷Ku bubasha bwayo, iraganje ubuziraherezo, amaso yayo akagenzura amahanga yose, kugira ngo ibyigomeke bitabyutsa umutwe. (guceceka akanya gato)

⁸Bihugu mwese, nimurate Imana yacu, muhanike amajwi muririmba ibisingizo byayo;

⁹kuko ari yo itubeshejeho, kandi ntireke ibirenge byacu bidandabirana.

¹⁰Nyamara, Nyagasani, ntiwabuze kuduha ibigeragezo, maze uratuyungurura nk’uko bayungurura feza.

¹¹Watuganishije aho umutego uri, maze uwo mutego udukobanya ibiyunguyungu.

¹²Wemeye ko batugira nk’itungo riheka imizigo, utunyuza mu muriro no mu mazi, ariko amaherezo ubidukuramo, turahumeka.

¹³None ninjiye mu Ngoro yawe nzanye ibitambo bitwikwa, nje kuguhigura nk’uko nabisezeranye,

¹⁴nkabyivugira ubwanjye igihe nari ngeze ahaga.

¹⁵Ndagutura ibitambo bitwikwa by’amatungo y’imishishe, hamwe n’impumuro nziza y’inyama z’amapfizi y’intama, ndetse ngerekeho n’ibimasa n’amasekurume y’ihene. (guceceka akanya gato)

¹⁶Abubaha Imana mwese, nimuze mwumve, mbatekerereze ibitangaza yankoreye.

¹⁷Uko umunwa wanjye wamutakiraga, ni na ko ururimi rwanjye rwamusingizaga.

¹⁸Iyo umutima wanjye utwarwa n’ikibi, Nyagasani nta bwo aba yaranteze amatwi.

¹⁹Ariko Imana yaranyumvise, yita ku isengesho ryanjye riyitakambira.

²⁰Imana iragahora isingizwa, yo itirengagije isengesho ryanjye, cyangwa ngo ireke kungirira ubuntu.