Read kinyarwanda Zaburi 69 Bible Online

Zaburi 69 - kinyarwanda bible

Zaburi 69

¹[80] Igenewe umuririmbisha. Mu ijwi rya «Amalisi». Iri mu zo bitirira Dawudi.

²Ndohora, Mana yanjye, kuko amazi angeze mu ijosi.

³Ndarigita mu isayo, simfite aho nashinga ikirenge; nazikamye mu kizenga, n’umuvumba urampururana.

⁴Singishobora no gutabaza, umuhogo wanjye wasaraye; amaso yanjye yaruhijwe no gutegereza Imana yanjye.

⁵Abanyangira ubusa, bararuta ubwinshi umusatsi wanjye; abo banyazi bafite amaboko, barampiga, baranyishyuza ibyo ntigeze niba.

⁶Mana, uzi neza ubupfu bwanjye, kandi n’ibicumuro byanjye ntibikwihishe.

⁷Nyagasani, Mugaba w’ingabo, sinzakoze isoni abakwiringira, ngo ntere ikimwaro abagushakashaka, Mana ya Israheli!

⁸Niyumanganya ibitutsi, ku mpamvu yawe, nkemera gukozwa isoni n’ikimwaro;

⁹nahindutse umunyamahanga mu bavandimwe, mba n’intamenyekana muri bene mama.

¹⁰Ni koko, ishyaka mfitiye Ingoro yawe riramparanya, n’ibyo bagutuka ni jye bishengura.

¹¹Nicishije bugufi nsiba ibyo kurya, maze ibyo bimviramo ibitutsi;

¹²nambaye ikigunira cy’agahinda, nuko mpinduka urw’amenyo;

¹³abicaye ku irembo ni jye bataramiraho, n’abasinzi bangize indirimbo.

¹⁴Ubu rero, Uhoraho, wumve isengesho ryanjye; igihe cyo kuntabara kirageze, Mana, Nyir’ubuntu budashira, undengere kuko ari wowe nkesha agakiza.

¹⁵Unsayure mu nzarwe, nekuzikama; umvane mu minwe y’abanyibasiye, unkure mu mazi abira!

¹⁶Sintwarwe n’amazi ahurura, ikizenga ntikindenge hejuru, kandi sincubire mu kuzimu kw’imva!

¹⁷Unsubize, Uhoraho, kuko impuhwe zawe zihebuje; ugirire urukundo rwawe maze unyiteho;

¹⁸ntuhishe umugaragu wawe uruhanga rwawe, ndi mu kaga, ntutinde kuntabara;

¹⁹umbe hafi ngo undengere, unkize abanzi banjye.

²⁰Uzi uko ntukwa, ngasuzugurwa, ngakozwa n’ikimwaro; abanzi banjye bose bakuri imbere.

²¹Ibitutsi byambihije umutima, bimviramo no kurwara; ntegereza uwangoboka, ndaheba, nshaka uwampoza, sinamubona!

²²Ibiryo byanjye babiroshyemo uburozi, inyota inyishe banyuhira indurwe.

²³Ibirori byabo bizabagaruke, n’incuti zabo zibifatirwemo.

²⁴Amaso yabo aragahumirako, n’umugongo ucike bubube.

²⁵Ubacurireho umujinya wawe, n’umuriro w’uburakari bwawe ubokere.

²⁶Urugo rwabo rurakaba itongo, amahema yabo abure abayatura.

²⁷Barahuhura uwo wowe wihaniye, kandi bagashengura uwo wanegekaje.

²⁸Ubahamye ibicumuro byabo byose, maze bekukugiraho ubwiregure;

²⁹bahanagurwe mu gitabo cy’ubuzima, maze bekubarirwa hamwe n’intungane.

³⁰Naho jyewe, w’ingorwa n’umubabare, ubuvunyi bwawe, Mana, buranyunamure!

³¹Ubwo nzaririmbe izina ryawe, kandi ndyamamaze mu bisingizo.

³²Ibyo bizanyura Uhoraho, kurusha ikimasa namutura, cyangwa imfizi y’amahembe n’ibinono.

³³Abiyoroshya nibabibona, bazishima, bati «Mwebwe abashakashaka Imana, murakagwira!»

³⁴Kuko Uhoraho yumva abatishoboye, ntatererane abe bari ku ngoyi.

³⁵Ijuru n’isi nibimurate, hamwe n’inyanja n’ibiyirukamo byose.

³⁶Kuko Imana izarokora Siyoni, ikazasana imigi ya Yuda, bakahasubirana, bakahatunga;

³⁷inkomoko y’abagaragu bayo ikazaharagwa, maze abakunda izina ryayo bakahatunga.