Read kinyarwanda Zaburi 71 Bible Online

Zaburi 71 - kinyarwanda bible

Zaburi 71

¹[82] Uhoraho, ni wowe buhungiro bwanjye, sinzateterezwa bibaho.

²Mu butabera bwawe unkiranure, undengere, untege amatwi maze undokore.

³Umbere urutare negamira, nshobora guhungiramo buri gihe; wiyemeje kunkiza, wowe rutare rwanjye rw’intamenwa.

⁴Mana yanjye, urankize abagiranabi, unkure mu minwe y’ababisha n’abagome.

⁵Ni wowe mizero yanjye, Nyagasani, Uhoraho, ni wowe niringira kuva mu buto bwanjye.

⁶Narakwisunze kuva nkivuka, unyitorera nkiva mu nda ya mama, ni cyo gituma nzahora ngusingiza.

⁷Abenshi baketse ko wamvumye, kandi ari wowe buhungiro bwanjye.

⁸Umunwa wanjye wuzuye ibisingizo byawe, iminsi yose ndirimba ikuzo ryawe.

⁹Ntunyibagirwe ngeze mu zabukuru, ngo untererane imbaraga zincika.

¹⁰Abanzi banjye baramvuga, n’abangenza banyumvikaniyeho.

¹¹Baravuga bati «Imana yaramutereranye, nimumuhige, mumusumire, nta we uzamutabara!»

¹²Mana, ntunjye kure, Mana yanjye, ubanguke undengere!

¹³Abahiga amagara yanjye, nibagende bakorwe n’isoni! Abanyifuriza nabi, nibahazwe agasuzuguro n’ikimwaro!

¹⁴Naho jyewe, nzahora nkwizera, nkuririmbire ubudahwema ibisingizo.

¹⁵Nzatangaza ukuntu uri indahemuka, iminsi yose namamaze agakiza kawe, kuko ibyiza byawe bitagira ingano.

¹⁶Nzageza n’aho ndata ibigwi byawe, Uhoraho, ahasigaye namamaze ubudahemuka bwawe.

¹⁷Mana, wanyiyigishirije kuva mu buto bwanjye, na n’ubu ndacyarata ibyiza byawe.

¹⁸None ubwo ngeze mu zabukuru, Mana, ntuzantererane, kugira ngo nzashobore kumenyesha urubyiruko, kimwe n’imbyaro zose zizaza ibikorwa by’ububasha bwawe.

¹⁹Mana, ubudahemuka bwawe burahebuje, wowe wakoze ibintu by’agatangaza, Mana, ni nde uhwanye nawe?

²⁰Ku mpamvu yawe nemeye amakuba n’ibyago; nyamara uzangarukira umbesheho, maze unzikure mu nyenga y’ikuzimu.

²¹Uzansubiza agaciro kanjye, maze wongere umpumurize.

²²Nanjye nzagusingiriza ku murya w’inanga, nzagushimire ubudahemuka bwawe, Mana yanjye, nzagucurangira umuduri, wowe Nyir’ubutagatifu wa Israheli.

²³Nzagusingiriza mu ndirimbo, nkuvugirize impundu kuko wanyunamuye.

²⁴Iminsi yose nzamamaza ubutabera bwawe, kuko abanyifuriza nabi, bahagijwe agasuzuguro n’ikimwaro!