Read kinyarwanda Zaburi 72 Bible Online

Zaburi 72 - kinyarwanda bible

Zaburi 72

¹[83] Yitiriwe Salomoni Mana, umwami umwegurire ubucamanza bwawe, uwo mwana w’umwami, umutoze ubutabera bwawe;

²acire umuryango wawe imanza ziboneye kandi arengere n’ingorwa zawe.

³Imisozi nikwize rubanda amahoro, n’imirenge ibazanire ubutabera.

⁴Azarenganura rubanda rugufi, arokore abatindahare, kandi aribate uwabakandamizaga.

⁵Azaramba ak’izuba, amare ibihe bitabarika nk’ukwezi;

⁶amere nk’imvura igwa mu rwuri, mbese nk’imvura y’umurindi ibobeza ubutaka!

⁷Mu gihe cye, ubutabera buzasagamba, n’amahoro asesure, mu mezi atabarika.

⁸Azategeka kuva ku nyanja kugera ku yindi, avane ku Ruzi ageze ku mipaka y’isi.

⁹Abamutambamiye bazapfukama imbere ye, maze abanzi be bazarigate umukungugu.

¹⁰Abami b’i Tarishishi n’ab’ibirwa bazamutura, abami b’i Seba, n’ab’i Saba bamurabukire.

¹¹Abami bose bazapfukama imbere ye, amahanga yose amuyoboke.

¹²Azarokora ingorwa zitakamba, n’indushyi zitagira kirengera.

¹³Azagirira ibambe ingorwa n’utishoboye, aramire ubuzima bwabo.

¹⁴Azabakiza ububisha n’agahato, kuko we abona amagara yabo afite agaciro.

¹⁵Azaramba bamuture zahabu y’i Saba; bazamusabire ubudahwema, bamwifurize umugisha iminsi yose.

¹⁶Hazaba uburumbuke bw’ingano mu gihugu, amahundo ahungabane kugeza mu mpinga z’imisozi, atubuke nk’indabyo zo muri Libani, umusaruro ungane n’ibyatsi byo mu mirima!

¹⁷Izina rye rizavugwa ubuziraherezo, ubwamamare bwe bumare igihe nk’izuba! Imiryango yose y’isi izamuherwemo umugisha, amahanga yose amwite umunyahirwe!

¹⁸Haragasingizwa Uhoraho, Imana ya Israheli, we wenyine ukora ibitangaza!

¹⁹Izina rye ry’ikuzo riragasingizwa ubuziraherezo, ikuzo rye riragasakara ku isi yose! Amen! Amen!

²⁰Ngiri iherezo ry’amasengesho ya Dawudi, mwene Yese.