Read kinyarwanda Zaburi 73 Bible Online

Zaburi 73 - kinyarwanda bible

Zaburi 73

¹[84] Ni zaburi ya Asafu. Koko, Imana ikunda Israheli, n’abafite umutima ukeye bose.

²Nyamara hari hato ngasitara, habuze gato ngo ngwe;

³kubera ishyari nari mfitiye abagiranabi, kubona byose ari bo bihira!

⁴Nta cyo bigomwa kugeza bapfa, igifu cyabo gihora cyuzuye;

⁵nta cyo bazi mu miruho y’abantu, ibyago bibacaho bikagwira abandi.

⁶Ubwirasi burababereye nk’umutako, urugomo rubizihiye nk’umwambaro;

⁷umurengwe ubatera kurebana agasuzuguro, ubucakura bukabasaguka umutima.

⁸Barannyegana, bakavugana ububisha, bigamba uko bari buhemuke;

⁹imvugo yabo itera no mu ijuru, akarimi kabo kararitse ibyo ku isi.

¹⁰Ni yo mpamvu umuryango wanjye ubohokaho, bakawuhira amagambo yabo nk’amazi,

¹¹bavuga bati «Imana izabimenya ite? Uwo hejuru iriya hari icyo yimenyera?»

¹²None ngaha abagiranabi, baragwiza umutungo, nta cyo bikanga.

¹³Naho jye kugumana ubupfura byamariye iki, ngo aha ndaharanira ubuziranenge!

¹⁴Buri munsi ndakubitwa, kandi buri gitondo ngahabwa igihano;

¹⁵nyamara iyo niyemeza kuvuga nka bo, najyaga kuba ngambaniye abana bawe tuva inda imwe!

¹⁶Nuko mbanza gutekereza ngo mbyumve; ariko nsanga bimbereye urujijo,

¹⁷kugeza ubwo ninjira mu Ngoro y’Uhoraho, maze nsobanukirwa iby’amaherezo yabo.

¹⁸Ni koko, wabaganishije aharindimuka, ngo ubagushe mu mutego!

¹⁹Mbega ngo baracemererwa mu kanya gato! Bahindutse ubusa bishwe n’ubwoba!

²⁰Nk’uko umuntu arota inzozi yakanguka akazibagirwa, nawe Nyagasani, uzabasuzugure, woye no kwibuka uko basa.

²¹Igihe umutima wanjye wari wuzuye amaganya, nashengutse umubiri wose,

²²bwari ubugoryi bwo kutabyumva, nari igicucu mu maso yawe!

²³Koko icyo gihe cyose nari kumwe nawe, umfashe ukuboko kw’iburyo.

²⁴Uzanyoboresha inama zawe, maze uzangeze mu ikuzo ryawe.

²⁵Ni nde wundi ngira mu ijuru wo kuntabara? Nta kindi kindi nakwifuza hano ku isi, kandi ngufite!

²⁶Umubiri wanjye n’umutima wanjye bishobora gucogora, ariko wowe, Mana yanjye, uri urutare negamiye n’umugabane wanjye iteka ryose!

²⁷Ngaha abakujya kure bararimbuka, abaguhungaho ukabatsemba.

²⁸Naho jyewe, kwegera Imana ni yo mahirwe yanjye; Nyagasani Uhoraho, ni we niringiye, kugira ngo nzarate ibyiza byose yakoze.