Read kinyarwanda Zaburi 74 Bible Online

Zaburi 74 - kinyarwanda bible

Zaburi 74

¹[85] Ni igisigo cya Asafu. Nyagasani, ni iki cyatumye uduta burundu? Ni iki cyatumye uburakari bwawe bugurumanira ubushyo bwo mu nkome yawe?

²Ibuka ikoraniro ryawe wironkeye kuva kera, ubwoko wishakiye ko bukubera imbata, wibuke n’umusozi wa Siyoni washinzeho Ingoro yawe!

³Zamuka werekeza muri ayo matongo; wirebere ibyo umwanzi yononnye byose mu Rusengero.

⁴Abagutambamiye bavugirije induru mu ijabiro ryawe watwakiriragamo, bahashinga amabendera yabo.

⁵Basaga n’abatutizi babanguye intorezo zabo mu ishyamba,

⁶bamenagurira icyarimwe amashusho, bayakubita intorezo n’amafuni!

⁷Ingoro yawe bayihereje inkongi, bahirika ku butaka inteko y’izina ryawe!

⁸Ubwo abo bagome banoza umugambi wo gutwika aho bagusengeraga hose mu gihugu.

⁹Nta hakiboneka ibimenyetso bikuranga, nta n’umuhanuzi ukibaho, kandi nta n’umwe muri twe uzi aho bizahereza!

¹⁰Mana, umwanzi azadutuka bihereze hehe? Mbese umwanzi azakomeza agusuzugure na ryari?

¹¹Ni iki gituma udukuraho amaboko, ugakomeza kwipfumbata, nta cyo utumarira?

¹²Nyamara, Mana, uri umwami wanjye kuva kera na kare, ni wowe wagobotoye igihugu cyacu!

¹³Ni wowe wasatuye inyanja ku bubasha bwawe, ikiyoka cyo mu mazi, ukimenagura imitwe.

¹⁴Ni wowe wajanjaguye imitwe ya cya Leviyatani[86], ukigaburira inyamaswa zo mu nyanja.

¹⁵Ni wowe wavubuye isoko n’umugezi, wumisha inzuzi zidakama.

¹⁶Umunsi ni uwawe, ijoro na ryo ni iryawe; ni wowe wahanze ukwezi n’izuba;

¹⁷ni wowe washinze imipaka yose y’isi, icyi n’itumba, ni wowe wabishyizeho.

¹⁸Uhoraho, uribuke ko umwanzi yagututse, ko inyoko y’abasazi yandavuje izina ryawe!

¹⁹Ubuzima bw’abagukunda, ntubugabize ibikoko, ntutererane buheriheri ingorwa zawe zagirijwe.

²⁰Ibuka Isezerano ryawe, maze wirebere: amikingo yose y’igihugu yabaye indiri y’urugomo!

²¹Ntutume urenganywa atahana ikimwaro, ahubwo umukene n’imbabare bagende bakuramya!

²²Uhoraho, tabara; urengere ibyawe, wibuke ibitutsi bidahosha bya bariya basazi!

²³Ntiwibagirwe induru y’abanzi bawe, n’akamu kiyongera k’abagusembura!