Read kinyarwanda Zaburi 75 Bible Online

Zaburi 75 - kinyarwanda bible

Zaburi 75

¹[87] Igenewe umuririmbisha. Ijwi rya «Witsemba». Ni zaburi ya Asafu.

²Turagushimira, Mana, turagushimira, turiyambaza izina ryawe, tukamamaza ibyiza byawe.

³Uhoraho aravuga ati «Igihe nagennye nikigera, jyewe nzaca imanza zitabera.

⁴Isi ishobora guhungabana, kimwe n’abayituye bose, ariko ni jye ushyigikiye inkingi zayo. (guceceka akanya gato)

⁵Nabwiye abirasi nti ’Nimurekere aho kwirata!’ n’abagiranabi nti ’Mutongera gushinga ijosi;

⁶nimwoye gukabiriza ububasha bwanyu, nimuhore ayo mateshwa yanyu!’»

⁷Imana ntiturutse mu burasirazuba cyangwa mu burengero bwaryo, emwe ntinavuye mu butayu cyangwa mu misozi;

⁸nyamara ngiyi iraje, yo mucamanza w’intabera, ucisha bugufi bamwe, abandi akabakuza.

⁹Uhoraho afite igikombe mu ntoki ze, kirimo divayi isharira kandi isembuye. Abagiranabi bose b’isi bazayinywa, bayikonoze kugeza ku matepfu.

¹⁰Naho jyewe, nzahora nsabagizwa n’ibyishimo, kandi nzacurangira Imana ya Yakobo,

¹¹ari na yo izacubya ubwirasi bw’abagiranabi, maze ab’indahemuka babyutse umutwe.