Read kinyarwanda Zaburi 78 Bible Online

Zaburi 78 - kinyarwanda bible

Zaburi 78

¹[90] Ni igisigo cya Asafu Muryango wanjye, wumve neza ibyo nkwigisha, utege amatwi amagambo y’umunwa wanjye;

²ngiye kuvugira mu migani, ngo ntangaze amayoberane y’ibihe byahise.

³Ibyo twabwiwe, kandi tumenyereye, ibyo ba data batugejejeho,

⁴natwe ntituzabihisha abana bacu, ahubwo tuzamenyesha urubyaro rwacu, ibyo bazakurizaho gusingiza Uhoraho, ububasha bwe n’ibyiza yakoze.

⁵Yashingiye itegeko Yakobo, ashyiraho amabwiriza muri Israheli, ategeka ababyeyi bacu kubimenyesha abana babo,

⁶kugira ngo ab’igisekuruza kizaza babimenye, ari bo bana bazavuka, ngo na bo bazabigeze ku mbyaro zabo.

⁷Ni ibyo bizatuma bizera Imana, bakirinda kwibagirwa ibyo yakoze, ahubwo bagahugukira amategeko yayo;

⁸bityo ntibazabe nk’ababyeyi babo, igisekuruza kitagira umutima ushyitse, ntikigire imigambi ihuje n’iy'Imana.

⁹Abo mu muryango wa Efurayimu bari bazi kurashisha umuheto, niba baratsimbuwe ku rugamba,

¹⁰ni uko bataye Isezerano ry’Imana, bakanga gukurikiza amategeko yayo.

¹¹Biyibagije ibigwi byayo, n’ibyiza yari yarabagiriye,

¹²bya bitangaza yakoreye imbere y’ababyeyi babo, mu gihugu cya Misiri, mu mirambi ya Tanisi.

¹³Yasatuye inyanja, maze irabahitisha, kandi ihagarika amazi nk’inkike;

¹⁴ku manywa ibayoboza agacu kererana, n’icyezezi cy’umuriro buri joro.

¹⁵Yasaturiye ibitare mu butayu, ngo ibuhire isoko y’amazi afutse;

¹⁶urutare irubyaza imigezi itemba nk’amasumo.

¹⁷Nyamara bo bakomeje kuyicumuraho aho mu butayu, bagarambira Imana Isumbabyose;

¹⁸biyemeza kwinja Imana, bayaka ibyo kurya ngo bahage.

¹⁹Bitotombeye Imana, bavuga bati «Mbese Imana yashobora kuduterera ameza mu butayu?

²⁰Ni koko, yakubise urutare, iruvuburamo imigezi y’amazi; ariko se, yashobora no gutanga umugati, cyangwa ikabonera inyama umuryango wayo?»

²¹Uhoraho amaze kubyumva ararakara, umuriro wokera Yakobo, uburakari bugurumanira Israheli,

²²kuko batari bizeye Imana, ntibiringire ubuvunyi bwayo.

²³Nuko itegeka ibicu byo hejuru, maze yugurura amarembo y’ijuru;

²⁴ibanyanyagizaho manu ngo barye, ibaha ingano zo mu ijuru,

²⁵muntu arya umugati w’abamalayika, iboherereza ibiribwa bibamaze ipfa.

²⁶Nyuma ihuhera umuyaga w’iburasirazuba, kandi ku bubasha bwayo izana umuyaga w’amajyepfo,

²⁷maze ibamanuriraho inyama zinganya ubwinshi n’umukungugu, ibagushaho inyoni z’uruhuri, nk’umusenyi wo ku nyanja;

²⁸izirekurira rwagati mu ngando, hirya no hino y’amahema yabo.

²⁹Bararya, maze barahaga, ibamara ityo irari bari bafite.

³⁰Igihe batarashira ipfa, bagifite ibiryo mu kanwa,

³¹uburakari bw’Imana burabagwira, maze ibicamo ab’intwari, igubangura abanyamaboko ba Israheli.

³²Nyamara ibyo ntibyababujije gucumura, no kutizera ibitangaza byayo.

³³Noneho ubuzima bwabo, ibuhuha nk’umuyaga, n’imyaka yabo ihita vuba na bwangu.

³⁴Iyo yabiraragamo, ni bwo bayishakashakaga, bakisubiraho, bakayigarukira!

³⁵Ubwo bakibuka ko Imana ari yo rutare begamiye, ko Isumbabyose ari yo ibarengera!

³⁶Cyakora ntibayibwizaga ukuri, yari amagambo yo ku rurimi gusa;

³⁷umutima wabo wari uyiri kure, n’Isezerano ryayo bataryizeye.

³⁸Nyamara yo, Nyir’ibambe, aho kubarimbura, ikabababarira; kenshi yacubije uburakari bwayo, ntiyakurikiza uko bayibabaje.

³⁹Yibuka ko ari abantu gusa, barimo umwuka ushira vuba, ntugaruke.

⁴⁰Mbega ngo barayigarambira mu butayu, bakayirakariza kenshi ahadatuwe!

⁴¹Bongeye kwinja Imana, no gushavuza Nyir’ubutagatifu wa Israheli,

⁴²bibagirwa ibyo yabakoreye umunsi ibagobotora mu minwe y’abanzi!

⁴³Nyamara yerekaniye ibimenyetso byayo mu Misiri, ikorera n’ibitangaza mu mirambi ya Tanisi;

⁴⁴imiyoboro y’amazi iyihindura amaraso, kugira ngo batanywa ku migezi yabo.

⁴⁵Yaboherereje ibibugu birabarya, n’imitubu irabajujubya;

⁴⁶iterereza inzige mu myaka yabo, n’ibihore mu mbuto bavunikiye.

⁴⁷Imizabibu yabo yayirimbuje urubura, n’imivumu yabo iyikobaguza amahindu;

⁴⁸amatungo yabo iyagabiza urubura, n’amashyo yabo iyaterereza inkuba.

⁴⁹Yabateje umuriro w’uburakari bwayo, umujinya, ubukana, n’ubumanjirwe, ibagabiza igitero cy’abamalayika b’icyorezo.

⁵⁰Mu burakari bwayo ntiyabaterereje urupfu gusa, ahubwo ubuzima bwabo bwose, ibuteza umuze.

⁵¹Nuko inangura icyitwa uburiza cyose mu Misiri, n’abavutse mbere bo mu mahema ya Kamu!

⁵²Hanyuma ihagurutsa imbaga y’umuryango wayo, iwuyobora mu butayu nk’ubushyo bw’intama.

⁵³Ibayoborana ituze, nta kibatera inkeke, naho abanzi babo barenzweho n’inyanja.

⁵⁴Yabinjije mu gihugu cyayo gitagatifu, ari wo musozi wigaruriwe n’indyo yayo.

⁵⁵Yirukanye amahanga imbere yabo, igihugu cyayo ikibagabanyamo iminani, amahema yayo iyatuzamo imiryango ya Israheli.

⁵⁶Nyamara bakomeje kugomera Imana Isumbabyose, no kuyitambamira baca ku mategeko yayo;

⁵⁷barayitengushye kimwe n’abasekuruza babo, basa n’umuheto uregutse ugatetereza nyirawo.

⁵⁸Bayibabaje bajya mu masengero y’ahirengeye, bayitera ishyari kubera ibigirwamana byabo.

⁵⁹Imana ibibonye ityo, irarakara, maze ihigika umuryango wa Israheli burundu;

⁶⁰yimuka mu Ngoro y’i Silo, mu ihema yari yarashinze rwagati mu bantu.

⁶¹Ubushyinguro bw’Isezerano yaraburetse buranyagwa, icyayiheshaga ikuzo kigwa mu maboko y’abanzi;

⁶²umuryango wayo iwugabiza inkota, yibasira abari imbata zayo.

⁶³Umuriro urimbura abasore babo, naho abakobwa babo ntibatahirwa ubukwe;

⁶⁴abaherezabitambo bicishwa inkota, maze abapfakazi babo ntibabaririra.

⁶⁵Ubwo Nyagasani arakanguka, nk’uwari usinziriye, nk’intwari isindutse divayi;

⁶⁶maze atsemba abanzi abaturutse inyuma, abakoza isoni ibi bidasubirwaho.

⁶⁷Ahigika umuryango wa Yozefu n’inzu ya Efurayimu ntiyayitora;

⁶⁸ahubwo ahitamo inzu ya Yuda, umusozi wa Siyoni yikundira.

⁶⁹Ahubaka Ingoro ye, arayikomeza nk’ibitwa by’ijuru, mbese nk’isi yashinze ubuziraherezo.

⁷⁰Nuko yitorera Dawudi ho umugaragu, amukuye mu rwuri rw’intama;

⁷¹amuvana inyuma y’intama zonsa, kugira ngo aragire Yakobo, umuryango we, na Israheli, umurage we.

⁷²Na we abaragirana umutima udakemwa, maze abayoborana ubwitonzi n’ubuhanga.