Read kinyarwanda Zaburi 79 Bible Online

Zaburi 79 - kinyarwanda bible

Zaburi 79

¹[91] Ni zaburi ya Asafu Mana, abanyamahanga barakurengereye, bahumanije Ingoro yawe ntagatifu, Yeruzalemu bayihinduye amatongo.

²Imirambo y’abagaragu bawe, bayigaburiye ibisiga byo mu kirere; imibiri y’abayoboke bawe, bayigaburira inyamaswa zo ku gasozi.

³Amaraso yabo bayamennye nk’umuvu w’amazi, mu mpande zose za Yeruzalemu, kandi nta wasigaye ngo abahambe.

⁴Abaturanyi bacu baradutuka, twahindutse insuzugurwa mu badukikije.

⁵Mbese Uhoraho, uzarakara na ryari? ishyari ryawe se rizakomeza rigurumane nk’umuriro?

⁶Ahubwo curira uburakari bwawe kuri ariya mahanga atakuzi, no kuri biriya bihugu bitakwiyambaza,

⁷kuko bariye Yakobo, umuryango wawe, bakayogoza umutungo we.

⁸Ntuduhore ibicumuro by’abasekuruza bacu, udusanganize bwangu impuhwe zawe, kuko tugeze ahaga!

⁹Dutabare, Mana y’agakiza kacu, ugiriye ikuzo ry’izina ryawe; turokore, maze utubabarire ibyaha byacu, ugiriye izina ryawe.

¹⁰Ni iki cyatuma amahanga avuga ngo «Mbese Imana yabo iba hehe?» Nibabimenye, natwe tubyirebere, ko uhorera amaraso y’abagaragu bawe.

¹¹Wumvane impuhwe amaganya y’ababoshye; wowe ufite ubushobozi umenye ubuzima bw’abaciriwe urwo gupfa.

¹²Nyagasani, inabi wagiriwe n’abaturanyi bacu, urayikube karindwi ibashegeshe umutima.

¹³Naho twebwe, umuryango wawe, ubushyo wiragiriye, tuzakuririmbire ibisingizo iteka, mu mbyaro zose twamamaze ikuzo ryawe.