Read kinyarwanda Zaburi 80 Bible Online

Zaburi 80 - kinyarwanda bible

Zaburi 80

¹[92] Igenewe umuririmbisha. Mu ijwi rya «Lisi y’Isezerano». Ni zaburi ya Asafu.

²Mushumba wa Israheli, tega amatwi, wowe uyobora Yozefu nk’ubushyo, wowe wicaye hejuru y’Abakerubimu, garagaza uwo uri we!

³Mu maso ya Efurayimu, Benyamini na Manase, garagaza ububasha bwawe, maze udutabare!

⁴Mana, tuzahure; ubengeranishe uruhanga rwawe, maze dukire!

⁵Uhoraho, Mugaba w’ingabo, uzahereza he kurakara, kandi umuryango wawe ukwiyambaza?

⁶Abawe wabahagije agahinda, ubuhira amarira barayasinda;

⁷watugize irwaniro ry’abaturanyi, abanzi bacu baduhindura urw’amenyo!

⁸Uhoraho, Mugaba w’ingabo, tuzahure, ubengeranishe uruhanga rwawe, maze dukire!

⁹Mu Misiri wahagemuye umuzabibu[93], wirukana amahanga, ngo wongere uwutere;

¹⁰wawukijije ibyari biwubambiye, na wo ushora imizi, ukwira igihugu cyose.

¹¹Igicucu cyawo cyatwikiriye imisozi, maze amashami yawo yugamisha n’amasederi yatumburutse;

¹²ugaba amashami yawo kugeza ku nyanja, n’imishibuka yawo igera ku Ruzi.

¹³Ni kuki waciye icyuho mu ruzitiro rwawo, ukaba usoromwa n’abahisi n’abagenzi;

¹⁴amasatura ava mu ishyamba akawonona, n’inyamaswa z’agasozi zikawurisha?

¹⁵Uhoraho, Mugaba w’ingabo, dukundire, ugaruke, urebere mu ijuru, witegereze, maze utabare uwo muzabibu;

¹⁶urengere igishyitsi witereye, n’umucwira ugukesha imbaraga.

¹⁷Abawutwitse bakawurimbura, bazamarwe n’umunya w’uruhanga rwawe!

¹⁸Ikiganza cyawe kizahore kiramburiye kuri ya Ntore[94] ishyigikiwe n’ukuboko kwawe, uwo mwana w’umuntu ugukesha imbaraga.

¹⁹Bityo ntituzongera kuguhungaho, uzatubeshaho, twiyambaze izina ryawe.

²⁰Uhoraho, Mugaba w’ingabo, tuzahure, ubengeranishe uruhanga rwawe, maze dukire.