Read kinyarwanda Zaburi 83 Bible Online

Zaburi 83 - kinyarwanda bible

Zaburi 83

¹[97] Iyi zaburi ni indirimbo ya Asafu.

²Mana, wikomeza kwicecekera; wirebera gusa nk’ikiragi!

³Dore ngaha abanzi bawe barahinda, n’abakurwanya babyukije umutwe.

⁴Baragambanira umuryango wawe, banamanama kugusha abo urengera;

⁵baravuga ngo «Nimuze dutsembe umuryango wabo, maze izina rya Israheli rye kuzavugwa ukundi!»

⁶Bahurije inama hamwe, bumvikanira kukurwanya.

⁷Abo ni abatuye Edomu n’Abayismaheli, ab’i Mowabu, na bene Hagara,

⁸bene Gebali, Hamoni na Amaleki, Abafilisiti hamwe n’Abanyatiri;

⁹ndetse n’Abanyashuru bifatanyije na bo, ngo batize amaboko bene Loti.

¹⁰Uzabagire nk’ab’i Madiyani na Sizera, nka Yabini ku mugezi wa Kishoni;

¹¹bashiriye ku iriba rya Harodi, bahinduka ifumbire y’ubutaka.

¹²Ibikomangoma byabo uzabigenzereze nka Orebu na Zehebu, abatware babo bose ubagire nka Zebahi na Salimuna,

¹³bo bari barihaye kuvuga ngo «Twigarurire igikingi cy’Imana!»

¹⁴Mana yanjye, urabahungabanye nk’uko umurama uhuherwa n’umuyaga.

¹⁵Nk’uko umuriro uyogoza ishyamba, cyangwa ikirimi cyawo kikababura imisozi,

¹⁶nawe ubakurikize inkubi y’umuyaga, bahahamurwe na serwakira.

¹⁷Uruhanga rwabo urukwize ikimwaro, maze babaririze izina ryawe, Uhoraho!

¹⁸Bazahorane iteka isoni n’ubwoba, babure amizero, bicwe n’ikimwaro;

¹⁹maze bazamenyereho ko ari wowe wenyine, Uhoraho, Umusumbabyose ku isi hose!