Read kinyarwanda Zaburi 84 Bible Online

Zaburi 84 - kinyarwanda bible

Zaburi 84

¹[98] Igenewe umuririmbisha. Ikajyana n’inanga y’Abagati. Ni zaburi y’abahungu ba Kore.

²Uhoraho, Mugaba w’ingabo, mbega ngo ingoro zawe zirantera ubwuzu!

³Umutima wanjye wahogojwe no gukumbura inkomane z’Uhoraho; umutima wanjye n’umubiri wanjye, biravugiriza impundu, Imana Nyir’ubuzima.

⁴Ndetse n’igishwi cyibonera inzu, n’intashya icyari ishyiramo ibyana byayo, ku ntambiro zawe, Uhoraho, Mugaba w’ingabo, Mwami wanjye, kandi Mana yanjye!

⁵Hahirwa abatuye mu Ngoro yawe, bakagusingiza ubudahwema! (guceceka akanya gato)

⁶Hahirwa abantu bisunga ububasha bwawe, bahorana umugambi wo kugana Ingoro yawe.

⁷Iyo bambutse ikibaya cya Rurira, bakibyaza amasoko, maze imvura y’impangukano ikahuzuza ibidendezi.

⁸Uko bagenda ni ko imbaraga zabo ziyongera, maze bagatunguka imbere y’Imana i Siyoni.

⁹Uhoraho, Mana y’ingabo, umva isengesho ryanjye: utege amatwi, Mana ya Yakobo. (guceceka akanya gato)

¹⁰Mana, wowe ngabo twikingira, reba, witegereze uruhanga rw’intore yawe.

¹¹Kuko umunsi umwe mu nkomane zawe undutira iyindi igihumbi namara ahandi, mpisemo kwigumira mu irebe ry’Ingoro y’Imana yanjye, aho gutura mu mahema y’abagiranabi.

¹²Koko Imana ni izuba, n’ingabo inkingira, Uhoraho agaba ubutoneshwe n’ikuzo; ntiyima ihirwe abagendera mu butungane.

¹³Uhoraho, Mugaba w’ingabo, hahirwa umuntu ukwiringira!