Read kinyarwanda Zaburi 85 Bible Online

Zaburi 85 - kinyarwanda bible

Zaburi 85

¹[99] Igenewe umuririmbisha. Ni zaburi y’abahungu ba Kore.

²Uhoraho, watonesheje igihugu cyawe, ugarura bene Yakobo bari barajyanyweho iminyago;

³wababariye umuryango wawe icyaha cyawo, uzimanganya ibicumuro byawo byose. (guceceka akanya gato)

⁴Wahosheje ubukana bwawe, uzibukira igikatu cy’uburakari bwawe.

⁵Tugarure, Mana mukiza wacu, maze ushire umujinya wari udufitiye.

⁶Mbese uzahora uturakariye igihe cyose, maze uburakari bwawe buhore bwiyongera?

⁷Si wowe se uzadukomorera ubuzima, maze umuryango wawe ukakuboneramo ibyishimo!

⁸Uhoraho, twereke impuhwe zawe kandi uduhe agakiza kawe.

⁹Ndashaka kumva icyo Uhoraho Imana avuze; aravuga iby’amahoro y’umuryango we n’abayoboke be, bapfa gusa kudasubira mu busazi bwabo.

¹⁰Koko ubuvunyi bwe buba hafi y’abamutinya, kugira ngo ikuzo rye rigume mu gihugu cyacu.

¹¹Impuhwe n’ubudahemuka byarahuriranye, ubutabera n’amahoro birahoberana.

¹²Ubudahemuka buzamera busagambe ku isi, maze ubutabera bubururukireho buva mu ijuru.

¹³Uhoraho ubwe azabaha ihirwe, maze isi yacu izarumbuke imbuto.

¹⁴Ubutabera buzamugenda imbere, n’intambwe ze zigaragaze inzira.