Read kinyarwanda Zaburi 86 Bible Online

Zaburi 86 - kinyarwanda bible

Zaburi 86

¹[100] Isengesho mu yo bitirira Dawudi. Uhoraho, tega amatwi, unsubize, kuko ndi umunyabyago w’umukene.

²Undwaneho kuko nakuyobotse, wowe Mana yanjye, ukize umugaragu wawe ukwiringiye.

³Nyagasani, ngirira imbabazi, ni wowe ntakira umunsi wose.

⁴Shimisha umutima w’umugaragu wawe, kuko ari wowe ndangamiye, Nyagasani.

⁵Nyagasani, wowe ugwa neza kandi ukagira ibambe, wowe ugirira impuhwe zihebuje abakwirukira bose.

⁶Utege amatwi, wumve isengesho ryanjye, uhugukire ijwi ryanjye ndagutakambira.

⁷Umunsi w’amage ndakwiyambaza, maze ukansubiza.

⁸Nyagasani, nta mana n’imwe muhwanye! Ibikorwa byawe ntibigereranywa.

⁹Amahanga yose wiremeye azaza agupfukamire, Nyagasani, maze ahimbaze izina ryawe,

¹⁰kuko uri igihangange, kandi ugakora ibitangaza, wowe wenyine, Mana y’ukuri!

¹¹Uhoraho, unyigishe inzira zawe, nshobore gukurikiza ukuri kwawe; utoze umutima wanjye igitinyiro cy’izina ryawe.

¹²Nyagasani, Mana yanjye, nzakurata n’umutima wanjye wose, nzahimbaza izina ryawe iteka ryose,

¹³kuko impuhwe ungirira ari nyinshi, ukaba warazahuye umutima wanjye mu kuzimu.

¹⁴Mana yanjye, abirasi barampagurukiye, inteko y’abagiranabi yahigiye kunkuraho; ndetse nawe ntibanakwitaho.

¹⁵Ariko wowe, Nyagasani, Mana y’imbabazi n’impuhwe, wowe utinda kurakara, wowe wuje urukundo n’ubudahemuka,

¹⁶ngarukira maze undwaneho, utere inkunga umugaragu wawe, urokore umwana w’umuja wawe.

¹⁷Ugaragaze ko ngufiteho ubutoni, maze abanyibasiye bazakorwe n’isoni, nibabona ko ari wowe, Uhoraho, untabara ukampoza.