Read kinyarwanda Zaburi 89 Bible Online

Zaburi 89 - kinyarwanda bible

Zaburi 89

¹[103] Ni inyigisho iri mu za Etani, Umwezirahi.

²Nzaririmba iteka ryose impuhwe z’Uhoraho, kuva mu gisekuruza kujya mu kindi; umunwa wanjye nzawamamarisha ubudahemuka bwawe,

³kuko wavuze uti «Impuhwe zashyizweho ubuziraherezo, ubudahemuka bwanjye bushinze umuzi mu ijuru.

⁴Nagiranye isezerano n’intore yanjye, nuko ndahira Dawudi, umugaragu wanjye nti

⁵’Inkomoko yawe nyishyizeho ubuziraherezo, kandi intebe yawe y’ubwami, nzayikomeza kuva mu gisekuruza kujya mu kindi.’» (guceceka akanya gato)

⁶Uhoraho, ijuru niryamamaze ibitangaza byawe, n’ubudahemuka bwawe mu ikoraniro ry’intungane.

⁷Mbese hejuru iyo, ni nde wagereranywa n’Uhoraho? Ni nde mu batuye ijuru wagereranywa n’Uhoraho?

⁸Uhoraho ni igihangange mu ikoraniro ry’intungane, arusha igitinyiro ibyegera bye byose.

⁹Uhoraho, Mana y’ingabo, ni nde umeze nkawe? Uhoraho, uri impangare, ukikijwe n’ubudahemuka!

¹⁰Ni wowe uhosha ubwivumbagatanye bw’inyanja, ugacubya imivumba yayo yatutumbye.

¹¹Ni wowe wahonyoye Rahabu nk’intumbi, abanzi bawe ubasanjisha ukuboko kwawe k’ububasha.

¹²Ijuru ni iryawe, isi na yo ni iyawe, umubumbe w’isi n’ibiwurimo, ni wowe wabihanze.

¹³Amajyaruguru n’amajyepfo, ni wowe wabiremye, Taboru na Herimoni birasingiza izina ryawe.

¹⁴Ni wowe nyir’ukuboko k’ubutwari, nyir’ikiganza cy’ububasha n’indyo y’impangare.

¹⁵Ubutabera n’ubucamanza ni ikibanza cy’intebe yawe, impuhwe n’ubudahemuka bikugenda imbere.

¹⁶Hahirwa umuryango wamenyereye kugusingiza, ukagendera mu cyezezi cy’uruhanga rwawe, Uhoraho;

¹⁷umunsi bahimbazwa n’izina ryawe, bagaterwa ishema n’ubutabera bwawe,

¹⁸kuko ubatera inkunga y’ikirenga, maze ugatuma twubura uruhanga.

¹⁹Uhoraho, ni wowe ngabo twikingira, kandi umwami wacu akomejwe na Nyir’ubutagatifu wa Israheli.

²⁰Kera wavuganiye n’abayoboke bawe mu ibonekerwa, maze uravuga uti «Nateye inkunga umuntu w’intwari, umwana w’umusore mutora muri rubanda.

²¹Nsanga Dawudi yambera umugaragu, maze musiga amavuta yanjye matagatifu;

²²ikiganza cyanjye kizamuramira, n’ukuboko kwanjye kuzamutize imbaraga!

²³Nta bwo azatungurwa n’umwanzi, n’umubisha nta bwo azamukangaranya;

²⁴abamutambamiye nzabararika imbere ye, maze abamwanga nzabacurangure.

²⁵Ubudahemuka bwanjye n’impuhwe zanjye bizahorana na we, maze azegure umutwe kubera izina ryanjye.

²⁶Nzamuha kugenga inyanja, azagire n’ububasha ku nzuzi.

²⁷We azanyiyambaza, agira ati ’Uri Data, uri Imana yanjye, uri urutare nkesha agakiza!’

²⁸Nanjye nzamugira imfura yanjye, n’ikirenga mu bami b’isi.

²⁹Nzamukomereza impuhwe zanjye ubuziraherezo, kandi iryo sezerano ntirizasubirwaho.

³⁰Ingoma ye nzayikomeza iteka, n’intebe ye y’ubwami izarambe nk’ijuru.

³¹Abana be nibarenga ku mategeko yanjye maze ntibakurikize amabwiriza yanjye,

³²nibaca ku matangazo yanjye, kandi ntibakomeze amategeko yanjye,

³³igicumuro cyabo nzagihanisha umunyafu, n’icyaha cyabo ngihanishe inkoni.

³⁴Ariko sinzamunyaga impuhwe zanjye, kandi sinzahemuka ku Isezerano ryanjye.

³⁵Sinzahuganya Isezerano ryanjye, kandi sinzisubira ku byo navuze.

³⁶Narahirishije rimwe rizima ubutagatifu bwanjye, sinabeshya Dawudi bibaho!

³⁷Inkomoko ye izahoraho ubuziraherezo, n’intebe ye y’ubwami izahoraho imbere yanjye nk’izuba;

³⁸izahoraho ubudahungabana nk’ukwezi kuzaba gihamya, idahinyuka mu kirere.» (guceceka akanya gato)

³⁹Cyakora, wowe wahigitse intore yawe, urayisuzugura kandi urayirakarira;

⁴⁰wihakanye isezerano wagiranye n’umugaragu wawe, uhumanya ikamba rye maze urita hasi!

⁴¹Waciye ibyuho mu nzitiro ze zose, ingerero ze zose uzigira amatongo;

⁴²abahisi n’abagenzi baramusahura, abaturanyi be bose baramunnyega.

⁴³Washishikaje abamutambamiye, abanzi be ubatera ishema;

⁴⁴inkota ye uyimaraho ubugi, maze ntiwamutera inkunga mu mirwano.

⁴⁵Wamushikuje mu kiganza inkoni y’ubwami, maze intebe ye uyitembagaza hasi;

⁴⁶wageruye iminsi y’ubusore bwe, umukwiza ikimwaro. (guceceka akanya gato)

⁴⁷Uhoraho, uzihisha ugeze na ryari? Mbese uburakari bwawe buzakomeza bugurumane?

⁴⁸Uribuke ko ubuzima bwanjye ari bugufi cyane, ko bene muntu wabaremeye ubusa!

⁴⁹Ni nde muntu uzabaho, maze ntahure n’urupfu, amagara ye akayarura mu nzara z’ikuzimu? (guceceka akanya gato)

⁵⁰Mbese za mpuhwe zawe za kera zahereye he, Nyagasani, izo wari warasezeraniye Dawudi mu budahemuka bwawe?

⁵¹Uhoraho, uzirikane ukuntu basuzugura umugaragu wawe, hamwe n’iyi mbaga yose ndagijwe.

⁵²Uhoraho, abanzi bawe barannyega, bagakurikiza umuvumo intore yawe!

⁵³Uhoraho aragasingizwa iteka ryose! Amen! Amen!