Read kinyarwanda Zaburi 9 Bible Online

Zaburi 9 - kinyarwanda bible

Zaburi 9

¹[10] Igenewe umuririmbisha, ikaririmbwa mu majwi y’abana. Ni zaburi iri mu zo bitirira Dawudi.

²[11] Uhoraho, ndagushimira n’umutima wanjye wose, ndamamaza ibigwi byawe byose.

³Umpaye kubyina kubera ibyishimo, ndaririmba izina ryawe, wowe Musumbabyose.

⁴Ndabona abanzi banjye bihinda bahunga, bakadandabirana, bakarimbukira imbere yawe,

⁵kuko wandengeye, ukamburanira, wicaye ku ntebe y’umucamanza w’intabera!

⁶Wakangaye amahanga, urimbura abatakuyoboka, usibanganya amazina yabo ubudasubirwaho.

⁷Abanzi warabatsembye, barazima buheriheri, imigi yabo urayisenyagura, iribagirana.

⁸Ariko Uhoraho aganje ubuziraherezo, ashinze intebe ye ngo ace imanza.

⁹Ni we ugengana isi ubutabera, agacira imanza imiryango ari nta ho abogamiye.

¹⁰Uhoraho nabe ubuvunyi bw’abashikamiwe, mu bihe by’amage nababere ubuvunyi.

¹¹Abazi izina ryawe nibakwiringire, Uhoraho, kuko udatererana abagushakashaka!

¹²Nimucyo turirimbire Uhoraho, uganje kuri Siyoni, nimwamamaze ibigwi bye mu mahanga!

¹³Kuko akurikirana uwamennye amaraso, ntabirangarane, ntiyirengagize imiborogo y’abanyabyago.

¹⁴Uhoraho, gira ibambe, urebe ibyago ndimo, ni wowe wanzahura, ukankura mu maboko y’urupfu,

¹⁵kugira ngo namamaze ibisingizo byawe, nishimire umukiro uguturukaho, ndi mu marembo y’umurwa wa Siyoni.

¹⁶Amahanga yaguye mu rwobo yari yacukuye, amaguru yabo afatirwa mu mutego bari bateze.

¹⁷Uhoraho yimenyekanyije, aca urubanza, maze umugome aboheshwa ingoyi ze bwite. (Umunihirizo, guceceka akanya gato)

¹⁸Abagiranabi nibasubire ikuzimu, n’abanyamahanga bose biyibagiza Imana.

¹⁹Ariko, umukene we ntazibagirana burundu, cyangwa ngo amizero y’umunyabyago ayoyoke.

²⁰Uhoraho, haguruka, hoye kugira umuntu wigamba, abanyamahanga nibacirwe urubanza, ubyirebera!

²¹Uhoraho, kangaranya ayo mahanga akuke umutima, yibuke ko ari abantu gusa! (guceceka akanya gato).