Read kinyarwanda Zaburi 91 Bible Online

Zaburi 91 - kinyarwanda bible

Zaburi 91

¹[105] Umuntu utuye aho Usumbabyose yibera, yikinga mu gacucu k’Ushoborabyose.

²Ndabwira Uhoraho nti «Uri Ubuhungiro bwanjye, n’inkunga yanjye, Mana yanjye, ni wowe niringiye!»

³Ni we uzakugobotora mu mutego w’umuhigi w’inyoni, anagukize icyorezo kirimbura imbaga.

⁴Azagutwikiriza amababa ye, maze uzahungire mu nsi y’amoya ye; ubudahemuka bwe ni ingabo n’umwambaro w’intamenwa.

⁵Ntuzatinya ibikuramutima by’ijoro, cyangwa umwambi uvumera wo ku manywa,

⁶icyorezo cyubikiye mu mwijima, cyangwa icyago kiyogoza ku manywa y’ihangu.

⁷N’ubwo iruhande rwawe hagwa igihumbi, n’ibihumbi cumi bikagwa iburyo bwawe, wowe ariko ntakizaguhuganya.

⁸Uzabe maso gusa, maze wirebere igihano cy’abagiranabi.

⁹Koko Uhoraho ni wowe miringiro yanjye. Usumbabyose wamugize ubuhungiro bwawe,

¹⁰icyago ntikizagushyikira, n’icyorezo ntikizegera ihema ryawe,

¹¹kuko yategetse abamalayika be kukurinda mu nzira zawe zose.

¹²Bazagutwara mu maboko yabo, ngo ikirenge cyawe kitazatsitara ku ibuye;

¹³uzakandagira intare n’impiri, uribate urusamagwe n’ikiyoka kinini.

¹⁴«Ubwo yanyiziritseho nzamuzigura, nzamurinda, kuko azi izina ryanjye.

¹⁵Nanyiyambaza, nzamwitaba, nzamuba hafi mu gihe cy’amage, nzamurokora, maze nzamuheshe ikuzo.

¹⁶Nzamuhaza iminsi irambye, maze nzamwereke agakiza kanjye.»