Read kinyarwanda Zaburi 92 Bible Online

Zaburi 92 - kinyarwanda bible

Zaburi 92

¹[106] Ni zaburi. Indirimbo igenewe umunsi wa Sabato.

²Ni byiza kugusingiza, Uhoraho, no gucurangira izina ryawe, Musumbabyose;

³kwamamaza ineza yawe kuva mu gitondo, n’ubudahemuka bwawe ijoro ryose,

⁴ku nanga no ku muduri, no mu ijwi ry’iningiri.

⁵Kuko ibyo wakoze, Uhoraho, byanshimishije, nkaba ndata umurimo w’ibiganza byawe.

⁶Mbega ngo ibikorwa byawe, Uhoraho, biraba agatangaza! Mbega ngo ibitekerezo byawe biraba indashyikirwa!

⁷Ibyo umuntu w’ikiburabwenge ntabimenya, n’uw’igipfayongo ntabisobanukirwa.

⁸Abagome basagamba nk’ibyatsi, abagiranabi bagahora batohagiye, nyamara bazatsiratsizwa buheriheri.

⁹Naho wowe, Uhoraho, uri Indashyikirwa ubuziraherezo;

¹⁰ngaha abanzi bawe Uhoraho bagiye kurimbuka, abagiranabi bose batatane.

¹¹Wampaye imbaraga nk’iz’imbogo, unsesekazaho amavuta akiri mashyashya;

¹²ijisho ryanjye ryiboneye abangenzaga, n’amatwi yanjye yiyumviye abangiriraga nabi.

¹³Umuntu w’intungane yatumburutse nk’umukindo, asagamba nka sederi yo muri Libani;

¹⁴ameze nk’igiti cyatewe mu Ngoro y’Uhoraho, akisanzurira mu nkike z’Imana yacu.

¹⁵No mu busaza bwe aba akera imbuto, aba acyuzuyemo ubuzima n’ubutohagire,

¹⁶kugira ngo yamamaze ko Uhoraho ari umunyabutungane, we Rutare rwanjye, ntiyigiramo uburiganya.