Read kinyarwanda Zaburi 94 Bible Online

Zaburi 94 - kinyarwanda bible

Zaburi 94

¹[108] Uhoraho, Mana ihora inzigo, Mana ihora inzigo, igaragaze!

²Haguruka, mucamanza w’isi, uhimure abirasi!

³Uhoraho, abagiranabi bazahereza he, bazahereza he kwitera hejuru?

⁴Bihaye kuvuga bihandagaje, abo bagizi ba nabi, bafite uruvugiro.

⁵Uhoraho, umuryango wawe barawutsikamira, umurage wawe barawisha agahato;

⁶barica umupfakazi n’umusuhuke, impfubyi bakazihotora.

⁷Kandi ni ko bavuga ngo «Uhoraho ntabibona, Imana ya Yakobo ntibyitayeho!»

⁸Muritonde, mwebwe biburabwenge mu bandi bose! Mwa bipfapfa mwe muzumva ryari?

⁹Mbese nyir’uguhanga amatwi, ni we utumva? Uwahimbye amaso se, ni we utabona?

¹⁰Ukosora amahanga se, ni we udashobora guhana? Uwigisha muntu ubuhanga se, ni we mubura bwenge?

¹¹Uhoraho azi neza ibitekerezo bya muntu, ko ari ubusabusa.

¹²Uhoraho, hahirwa umuntu wowe ukosora, maze ukamwigishisha amategeko yawe,

¹³kugira ngo ahorane ituze mu minsi y’amakuba, igihe umugiranabi acukurirwa imva.

¹⁴Kuko Uhoraho adatererana umuryango we akaba atareka umurage we;

¹⁵ubucamanza buzakurikiza ubutabera, ab’umutima ugororotse bose bazabuyoboke.

¹⁶Ni nde uzamvuganira akankiza abagome, akandenganura imbere y’abagiranabi?

¹⁷Iyo Uhoraho ataza kuntabara, hari hato nkiturira mu gihugu cy’abanumye!

¹⁸Iyo mvuze nti «Nta ho mpagaze!» ubuntu bwawe, Uhoraho, burandamira;

¹⁹igihe impagarara zinyuzuye umutima, ubuhumurize bwawe burampimbaza.

²⁰Mbese waba icyitso cy’urukiko rurenganya, rutera amakuba runyuranya n’amategeko?

²¹Bibasira ubuzima bw’intungane, bagacira urwo gupfa umuziranenge.

²²Ariko Uhoraho yambereye nk’ubuhungiro butavogerwa, Imana yanjye ni Urutare nikingamo;

²³yabituye ububisha bwabo, maze abarimbuza ubugome bwabo, Uhoraho, Imana yacu, arabatsemba!