Read kinyarwanda Zaburi 96 Bible Online

Zaburi 96 - kinyarwanda bible

Zaburi 96

¹[110] Nimuririmbire Uhoraho indirimbo nshya, isi yose niririmbire Uhoraho!

²Nimuririmbire Uhoraho, musingize izina rye. Uko bukeye mwogeze agakiza ke!

³Nimwamamaze ikuzo rye mu mahanga, n’ibyiza bye mu miryango yose!

⁴Kuko Uhoraho ari igihangange, akaba akwiye rwose ibisingizo, indahangarwa isumba imana zose;

⁵kuko imana zose z’amahanga ari ubusa, naho Uhoraho akaba yararemye ijuru.

⁶Arashashagira ubuhangare n’ishema, ingoro ye yuzuye ububasha n’ububengerane.

⁷Nimwegurire Uhoraho, miryango y’amahanga, nimwegurire Uhoraho ikuzo n’ububasha,

⁸nimwegurire Uhoraho ikuzo ry’izina rye. Nimuzane ituro mwinjire mu ngombe ze,

⁹nimwunamire Uhoraho wisesuyeho ubutagatifu, nimuhinde umushyitsi, bantu b’isi yose.

¹⁰Nimuvuge mu mahanga, muti «Uhoraho ni Umwami!» Yashinze isi yose, ntihungabana; imiryango yose ayicira urubanza rutabera.

¹¹Ijuru niryishime, kandi isi nihimbarwe! Inyanja niyorome, n’ibiyirimo byose!

¹²Imisozi nisabagire kimwe n’ibiyisesuyeho byose, n’ibiti byose by’ishyamba bivugirize impundu icyarimwe,

¹³mu maso y’Uhoraho, kuko aje, kuko aje gutegeka isi; azacira isi urubanza mu butabera, arucire n’imiryango mu butarenganya bwe.