Read kinyarwanda Imigani 10 Bible Online

Imigani 10 - kinyarwanda bible

Imigani 10

¹Iyi migani ni iya Salomoni[18]. Umwana witonda anezeza se, naho uw’igicucu agatera nyina agahinda.

²Umutungo w’umuhuguzanyo nta cyo umara, ariko ubutungane bukiza ingoyi y’urupfu.

³Uhoraho ntiyemera ko intungane yicwa n’inzara, ahubwo yamagana umururumba w’abagiranabi.

⁴Ukuboko k’umunebwe kuramukenesha, naho uk’umunyamwete kukamukiza.

⁵Uwizigamira mu mpeshyi aba ari umunyabwenge, naho usinzira imyaka yeze ni ikigoryi!

⁶Umugisha uranga umutwe w’intungane, naho umunwa w’abanyabyaha uba uhishe urugomo.

⁷Intungane bahora bayibuka bakayirata, naho izina ry’abagiranabi rirazima.

⁸Umutima w’umunyabuhanga wemera amategeko, naho umuntu w’umunyamagambo aba yihiga.

⁹Ugendera mu budahemuka, agendana amahoro, naho ukurikiza inzira ziziguye, bazamutahura.

¹⁰Uwica ijisho atera guhangayika, naho ucyaha yeruye agatera amahoro.

¹¹Umunwa w’intungane ni isoko y’ubuzima, naho uw’abagome uhisha urugomo.

¹²Urwango rukurura amahane, naho urukundo rukababarira ibicumuro byose.

¹³Iminwa y’umunyabwenge irangwa n’ubuhanga, naho umugongo w’igicucu ukavuzwa amahiri.

¹⁴Abanyabuhanga bahunika ubwenge; naho akanwa k’umusazi, ni rwo rupfu rumwugarije!

¹⁵Umutungo w’umukungu ni umurwa we ukomeye, igihe rubanda bicwa n’ubukene bwabo.

¹⁶Igihembo cy’intungane ni cyo kiyibeshaho, naho inyungu y’umugome ikamubyarira icyaha.

¹⁷Ukurikiza inama nziza aba ari mu nzira y’ubuzima, ariko uwanga kuburirwa arayoba.

¹⁸Ushaka kubundikira urwango rwe avugana uburyarya, kandi utinyuka gusebanya ni umusazi.

¹⁹Aho basukagura amagambo, icyaha ntikihatangwa, naho uzirika ururimi rwe ni umunyabwenge.

²⁰Ururimi rw’intungane ni nka feza iyunguruye, naho umutima w’umugiranabi nta gaciro ufite.

²¹Iminwa y’intungane igaburira imbaga, naho abasazi bakicwa n’ubucucu bwabo.

²²Umugisha w’Uhoraho ni wo ukiza, naho umuhihibikano nta cyo umaze.

²³Umupfayongo anezezwa no gukora ishyano, naho ubuhanga bukizihira umuntu ushyira mu gaciro.

²⁴Icyo umugiranabi atinya ni cyo kimubaho, ariko icyo intungane yifuje, iragihabwa.

²⁵Iyo serwakira ije ihitana umugiranabi, intungane yo ikaguma mu byimbo, ntiyegayege.

²⁶Nk’uko siki yonona amenyo, umwotsi ukangiza amaso, ni ko umunebwe agenzereza abamukoresha.

²⁷Kubaha Uhoraho bituma umuntu aramba; naho iminsi y’abagiranabi iragabanywa.

²⁸Intungane zitegereje ibyishimo, naho icyizere cy’abagiranabi kizayoyoka.

²⁹Inzira y’Uhoraho ni ubuhungiro bw’inyangamugayo, naho inkozi z’ibibi ikazibera impamvu yo kurimbuka.

³⁰Intungane nta na rimwe zizakangaranywa, ariko abagiranabi bo, ntibazaguma mu gihugu.

³¹Umunwa w’intungane usohokamo ubuhanga, naho ururimi rugenza amagambo y’ubugome ruzacibwa.

³²Iminwa y’intungane irangwa n’ubugwaneza, naho ururimi rw’ababi rukagenza ubugome.