Read kinyarwanda Imigani 12 Bible Online

Imigani 12 - kinyarwanda bible

Imigani 12

¹Uharanira ubwenge aba akunda kwigishwa, naho uwanga guhanwa ni igicucu.

²Uhoraho atonesha umuntu ukora neza, akamagana ugambiriye ikibi.

³Nta muntu ukomezwa no kugira nabi, kandi imizi y’intungane ntizarimburwa.

⁴Umugore ushiritse ubute ni ikamba ry’umugabo we, ariko utagira isoni aba ari nk’imungu mu magufa ye.

⁵Ibitekerezo by’intungane biba biboneye, naho imigambi y’umugiranabi ikaba iy’ibinyoma.

⁶Amagambo y’abagiranabi ni imitego yica, ariko umunwa w’intabera ni wo uzirokora.

⁷Iyo abagiranabi babirinduwe, bose bapfira gushira, ariko inzu y’intungane igahora ikomeye.

⁸Umuntu ashimirwa ko ashyira mu gaciro, naho uw’umutima w’ibinyoma akabigayirwa.

⁹Umuntu usanzwe ariko ufite umugaragu, aruta umwirasi utagira ikimutunga.

¹⁰Intungane imenya icyo amatungo yayo akeneye, ariko umutima w’umugiranabi uyagirira umwaga.

¹¹Uhinga umurima we abona ibimutunga bihagije, ariko uwiruka inyuma y’ibitagira shinge aba ari igicucu.

¹²Umugome ashaka umugabane ku byafatiwe mu mutego w’abagiranabi, nyamara imizi y’intungane ni yo yeza imbuto.

¹³Umunwa ucumura ubera nyirawo umutego, ariko intungane yikura mu kaga.

¹⁴Ibyiza bihaza umuntu, abikomora ku munwa we, kandi buri wese abona igihembo cy’ibyo yakoze.

¹⁵Inzira y’umusazi, kuri we iba iboneye, ariko umunyabuhanga agisha inama.

¹⁶Umujinya w’umusazi, awugaragariza aho, naho umunyabwenge arenza ku kababaro ke.

¹⁷Umunyakuri agaragaza ibiboneye, naho umunyabinyoma ashyigikira akarengane.

¹⁸Amahomvu y’umupfayongo ajombana nk’inkota, ariko ururimi rw’abanyabuhanga rurakiza.

¹⁹Umunwa uvuga ukuri uhora uhamye, naho ururimi rubeshya ni urw’umwanya muto gusa.

²⁰Ikinyoma cyarika mu mutima w’abagambiriye ikibi, naho abajyanama b’amahoro barangwa n’ibyishimo.

²¹Nta cyago gitera intungane, ariko abagiranabi birabugariza.

²²Iminwa irangwa n’ibinyoma itera ishozi Uhoraho, igihe abakorana ukuri bamuronkaho ubutoni.

²³Umunyabwenge ntagaragaza ubumenyi bwe, naho umutima w’ibicucu wamamaza ubusazi bwawo.

²⁴Ukuboko k’umunyamwete kuzategeka, naho uk’umunebwe kuzakoreshwa uburetwa.

²⁵Impungenge zishengura umutima w’umuntu, naho ijambo ryiza rikamushimisha.

²⁶Intungane iyobora mugenzi wayo, naho inzira y’abagiranabi irabayobya.

²⁷Ubunebwe ntibucyura umuhigo ngo buwuteke, ariko umwete ufitiye umuntu akamaro kanini.

²⁸Inzira y’ubutungane itanga ubuzima, naho iy’abagome iganisha ku rupfu.