Read kinyarwanda Imigani 17 Bible Online

Imigani 17 - kinyarwanda bible

Imigani 17

¹Akamanyu k’umugati ukakaye umuntu ariye mu mahoro, karuta inzu yuzuye inyama ariko irimo amahane.

²Umugaragu ushyira mu gaciro aruta umwana w’ikigoryi, kandi azahabwa umunani hamwe n’abandi bana.

³Uruganda rutunganya feza, itanura rigatunganya zahabu, ariko Uhoraho ni we ucengera mu mitima.

⁴Umugiranabi yita ku munwa w’umuhendanyi, umubeshyi agahugukira akarimi k’indyarya.

⁵Usetse umukene aba atutse Iyamuremye, uwishimira ibyago by’abandi azahanwa.

⁶Ikamba ry’abasaza ni abuzukuru babo, naho ibyishimo by’abana ni ba se.

⁷Imvugo inoze ntikwiranye n’igicucu, nkanswe amagambo y’ibinyoma ku gikomangoma.

⁸Umuntu uzi kugabira abandi, na we biramuhira, aho yerekeye hose, agera ku cyo yifuza.

⁹Uwihanganira igicumuro aba akomeje umubano, ariko ugitaranga atandukanya incuti.

¹⁰Ijambo rimwe uhanishije umunyabwenge rimugirira akamaro, karuse ak’inkoni ijana ku mupfayongo.

¹¹Umugiranabi ahora ashaka kwigomeka, ariko bazamwoherereza intumwa y’inkazi[22].

¹²Guhura n’ikirura bambuye ibyana, biruta guhubirana n’igicucu cyasaze.

¹³Uwitura ineza inabi, ibyago ntibizava mu nzu ye.

¹⁴Gushoza amahane ni nko kugomorora amazi, ujye wigendera intonganya zitaravuka.

¹⁵Ari ukwirengagiza icyaha cy’umugome, ari no kukigereka ku ntungane, byombi, Uhoraho arabyanga.

¹⁶Mbese imari y’umupfayongo yamumarira ike? Nta n’ubwo yayigura ubuhanga, kuko nta bwenge agira.

¹⁷Incuti ntihwema gukunda, kandi umuvandimwe avukira gutabara aho rukomeye.

¹⁸Umuntu w’igicucu yishingira abandi, akitangaho ingwate kuri mugenzi we.

¹⁹Ukunda amahane aba akunze icyaha, uwiterura aba ashaka kurimbuka.

²⁰Ufite umutima wuzuye uburyarya, ntagira ihirwe, kandi ufite ururimi rubi, agwa mu makuba.

²¹Ubyaye umupfayongo, bimutera agahinda, kandi se w’igicucu ntiyigera yishima bibaho.

²²Umutima ukeye ukomeza ubuzima, naho umutima ushavuye wumisha amagufa[23].

²³Umugiranabi yakira ruswa, kugira ngo arenganye umunyamurava.

²⁴Umunyabwenge ahora ahanze amaso ubuhanga, ariko amaso y’igicucu kirayazerereza kugeza iyo gihera[24].

²⁵Umwana w’igicucu ababaza se, kandi agatera agahinda nyina wamubyaye.

²⁶Guca ibihano intungane si byiza, ariko gukubita ibikomangoma, byo birenze urugero.

²⁷Uwifata mu magambo ye aba afite ubumenyi, kandi udapfa guhubuka aba ari umunyabwenge.

²⁸N’umusazi, iyo yicecekeye, bamwita umunyabuhanga, yafunga umunwa we, bakamwita umunyabwenge.