Read kinyarwanda Imigani 18 Bible Online

Imigani 18 - kinyarwanda bible

Imigani 18

¹Ushaka kwitaza abandi, abibonera impamvu, bamugira inama akarakara.

²Umupfayongo ntashaka kujijuka, ahubwo aharanira kwihesha ishema mu mvugo ye.

³Aho ubugome bwaje umugayo ntuhatangwa, kandi ubuhemu bukurura ikimwaro.

⁴Amagambo ava mu kanwa k’umuntu ni nk’amazi maremare, abamo isoko y’ubuhanga, akamera nk’umugezi utemba.

⁵Nta bwo ari byiza guca urubanza ubera umugome, ukarenganya intungane.

⁶Umunwa w’umupfayongo umukururira intonganya, naho ururimi rwe rumutegeza inkoni.

⁷Amagambo y’umupfayongo ni yo amworeka, kandi umunwa we ni wo mutego w’ubuzima bwe.

⁸Amagambo y’inzimuzi aba asize umunyu, aragenda agashyika ku nkingi z’umutima.

⁹Unebwa ku murimo we, aba ava inda imwe n’usenya.

¹⁰Izina ry’Uhoraho ni nk’umunara ukomeye, intungane iwirukiramo ikaba ikize icyago.

¹¹Umutungo w’umukire umubera nk’umugi ukomeye, ahora yizeye ko ari urukuta rutarengwa.

¹²Ubwirasi bw’umutima bubanziriza kurimbuka, naho uzi kwicisha bugufi, ni we uzakuzwa.

¹³Usubiza atarumva icyo bamubwiye, aba ari umusazi n’umupfayongo.

¹⁴Umutima w’umuntu umuramira mu ndwara, none se umutima washavuye ni nde wawuhembura?

¹⁵Umutima w’umunyabwenge uronka ubwitonzi, kandi ugutwi kw’abanyabuhanga gushaka ubumenyi.

¹⁶Icyo umuntu atanze kimuhesha inzira, kikamugeza imbere y’abakomeye.

¹⁷Ushoje urubanza asa n’uri butsinde, ariko umuburanyi we iyo aje, aramuhinyuza.

¹⁸Ubufindo bumara impaka, kandi bugakiranura ibikomerezwa[25].

¹⁹Umuvandimwe warakajwe ni nk’umugi w’intikorerezwa, kandi intonganya zihoraho nk’amapata yo ku nzugi z’umugi.

²⁰Umuntu ahazwa n’imbuto y’iminwa ye, ikimuva mu kanwa ni cyo gituma yijuta.

²¹Ururimi ni rwo rugenga urupfu n’ubuzima, abarwishinga bazabona ingaruka zabyo.

²²Uwashatse umugore[26] aba yarashyikiriye umukiro, kandi aba yararonse ubutoni kuri Uhoraho.

²³Umukene avuga yinginga, naho umukire agasubizanya umwaga.

²⁴Hari incuti zishora umuntu mu kaga, hari n’izishobora kumukunda kurusha umuvandimwe we.