Read kinyarwanda Imigani 2 Bible Online

Imigani 2 - kinyarwanda bible

Imigani 2

¹Mwana wanjye, uzumve amagambo yanjye kandi amategeko yanjye aguturemo.

²Uzatege ugutwi ubuhanga, umutima wawe wumve ukuri.

³Ni koko, niwitabaza ubwenge ukiyambaza ubushishozi,

⁴ukabushakashaka nka feza, ukabucukumbura nk’ubukungu,

⁵ni bwo uzasobanukirwa gutinya Uhoraho icyo ari cyo, kandi ubonereho kumenya Imana,

⁶kuko Uhoraho ari we utanga ubuhanga, mu munwa we ni ho haturuka ubumenyi n’ukuri.

⁷Ab’indakemwa abafashisha inama ze, abanyamurava akababera nk’ingabo ibakingira;

⁸arinda abagenda mu nzira iboneye, akaragira abayoboke be.

⁹Ubwo rero, uzasobanukirwa n’ubutabera, ubutungane n’umurava; mbese uzamenya inzira zose zitanga amahirwe.

¹⁰Bityo rero, ubuhanga nibumara kugucengera mu mutima, n’ubumenyi bukagutera kunezerwa,

¹¹ni bwo ubushishozi buzakurinda, n’ubwenge bukubere ubuhungiro.

¹²Bizakubuza icyerekezo kibi, bigutsindire umuntu wese ugenza amagambo y’ubugome,

¹³n’abataye inzira y’ubutungane bakaboneza iy’umwijima;

¹⁴bamwe nyine banyurwa no gukora ikibi, bagahimbazwa n’ubugome bwabo bukabije.

¹⁵Ni bo barangwa n’uburyarya, kandi bakanyura inzira ziziguye.

¹⁶Nugenza utyo, uzirinda umugore w’undi[6] cyangwa se uw’umuvantara w’amagambo asize umunyu,

¹⁷wa wundi watereranye incuti ye yo mu busore kandi akibagirwa isezerano ry’Imana ye.

¹⁸Ni koko, inzu ye ihengamiye ku rupfu, naho inzira ze zigana mu nyenga.

¹⁹Umuntu wese ugiye iwe, ntaba akigarutse ukundi, nta n’ubwo agera mu nzira y’ubuzima.

²⁰Naho wowe, uzanyure inzira z’ab’inyangamugayo, ukurikize imyifatire y’intungane.

²¹Ab’indakemwa bazatura mu gihugu, abanyamurava bakiganzemo;

²²naho abagome bacyirukanwemo, abagambanyi na bo bagicibwemo.