Read kinyarwanda Imigani 20 Bible Online

Imigani 20 - kinyarwanda bible

Imigani 20

¹Divayi itera ubupfu, inzoga zigakurura isindwe, uzishinga ntaba ari umunyabwenge.

²Uburakari bw’umwami ni nk’imitontomo y’intare, umurakaje aba yihemukiye ubwe.

³Umuntu wirinda impaka arabishimirwa, ariko uwitwa umusazi wese arazishigukira.

⁴Ku muhindo, umunebwe ntahinga, ku mwero, agashakashaka akabura icyo afata.

⁵Inama umutima wigira ni nk’amazi magari, umuntu uzi ubwenge ni ho avoma.

⁶Abantu benshi biratana ubudahemuka, ariko se ni nde wabona umuntu uvuga ukuri?

⁷Intungane irangwa n’umurava, hahirwa abana izasiga!

⁸Umwami aca imanza yicaye ku ntebe ye, ikibi cyose akagitahura n’amaso ye.

⁹Ni nde washobora kuvuga ngo «Nasukuye umutima wanjye, icyaha cyanjye naragihanaguye»?

¹⁰Ingero zitareshya n’iminzani ibeshya, byombi bitera Uhoraho ishozi.

¹¹Ibikorwa by’umusore byerekana niba azagira imyifatire itunganye kandi iboneye.

¹²Ugutwi kumva n’ijisho rireba, byombi byaremwe n’Uhoraho.

¹³Ntugakunde ibitotsi kugira ngo utazakena, kanguka ube maso uzabone ikigutunga.

¹⁴Uriho agura aravuga ati «Murampenda!» ariko avayo yirya icyara.

¹⁵Hariho zahabu n’ibirezi byinshi, ariko icy’ingenzi ni ururimi rwuje ubumenyi.

¹⁶Fata umwenda we kuko yishingiye uwo atazi, umwake ingwate kuko yemarariye abavantara!

¹⁷Umugati w’ubwambuzi uryohera umuntu, ariko nyuma yaho akanwa ke kuzura umusenyi.

¹⁸Imigambi ikomezwa no kuyigira hamwe n’abandi, uzashoze urugamba umaze kugisha inama abanyabwenge.

¹⁹Usebanya amena amabanga, ntukuzure n’ufite akarimi karekare!

²⁰Uvuma se na nyina, urumuri rwe ruzamuzimiraho mu ijoro ry’icuraburindi.

²¹Umurage uje huti huti amaherezo ntubona umugisha.

²²Ntuzavuge ngo «Nzitura inabi[28]!» iyumanganye, Uhoraho azagukiza.

²³Uhoraho yanga ibipimo bihuguza, iminzani yiba si myiza.

²⁴Uhoraho ni we uyobora intambwe z’umuntu, we yakumva ate aho ava n’aho agana?

²⁵Byakora ku muntu wavuga akina ngo «Iki nkeguriye Uhoraho», kandi atabanje kuzirikana neza icyo ari busezerane.

²⁶Umwami uzi ubwenge atahura abagome akabahana yihanukiriye.

²⁷Umutima w’umuntu ni itara Uhoraho yamuhaye, ngo rimurike ibimwihishemo byose[29].

²⁸Ubudahemuka n’umurava birinda umwami, na we ingoma ye akayishimangiza ubutabera.

²⁹Ishema ry’abasore ni ubugangare bwabo, naho umutako w’abasaza ni imvi zabo.

³⁰Inguma z’amaraso zicubya ubugome, naho imihini igakiza ingeso mbi.