Read kinyarwanda Imigani 21 Bible Online

Imigani 21 - kinyarwanda bible

Imigani 21

¹Umutima w’umwami uri mu kiganza cy’Uhoraho, akawuyobora, mbese nk’uko bayobora umugezi w’amazi aho bashatse hose.

²Inzira za muntu zose abona zimunogeye, ariko Uhoraho ni we upima imitima.

³Ubutungane n’ubutabera binyura Uhoraho, kuruta ibitambo[30].

⁴Indoro y’agasuzuguro n’umutima wirata ni byo bigaragaza icyaha cy’abagome.

⁵Imigambi y’umunyamwete iramukiza, ariko uhubuka wese aba asanga ubutindi.

⁶Umutungo w’umwibano ni ubusa buyoyoka, na bene wo baba bashaka urupfu.

⁷Ububisha bw’abagome ni bwo buboreka, kuko banga gukurikiza ubutabera.

⁸Inzira y’umwicanyi iba iziguye, naho imigenzereze y’intungane irangwa n’ubutabera.

⁹Biraruta kwinugika mu ngombe iri mu rugo, aho kubana mu nzu n’umugore w’umunyamahane.

¹⁰Umutima w’umugiranabi uhora ushaka ikibi, ndetse n’incuti ye ntayireba neza.

¹¹Nibakubita umusekanyi, injiji izakurizaho guca akenge, nibigisha umunyabuhanga, azunguka ubumenyi.

¹²Nyir’ubutungane yitegereza inzu y’abagiranabi, abagome bose akabarindimurira mu makuba.

¹³Uwanga kumva umunyantege nke amutabaje, na we azataka abure umutabara.

¹⁴Nta gihosha umujinya w’umuntu wafungije, nko kumugabira mwiherereye, cyangwa kumutura mu ibanga.

¹⁵Intungane inezezwa no kubahiriza ubutabera, naho abagiranabi bazarimbuka.

¹⁶Umuntu ubungera ntanyure inzira y’ubwitonzi, azaruhukira mu rugaga rw’ab’ikuzimu.

¹⁷Ukunda amaraha, azatindahara, ukunda divayi n’amavuta ntazakira.

¹⁸Umugome aba incungu y’intungane, naho umugambanyi akagwa mu kigwi cy’intabera.

¹⁹Gutura mu gihugu cy’ubutayu, biruta kubana n’umugore w’umushiha n’umunyamahane.

²⁰Mu nzu y’umunyabuhanga, habamo ubukungu bwinshi n’amavuta, ariko umunyabwenge buke atagaguza ibye.

²¹Ukurikirana ubutungane n’ubwitonzi, azaronka ubugingo, umukiro n’icyubahiro.

²²Umunyabuhanga afata mpiri umugi urimo ingabo z’intwari, agasenya inkuta zarindaga abawutuye.

²³Ufata ururimi rwe akabumba umunwa we, umutima we aba awurinze amakuba.

²⁴Uwirata agatukana, bamwita «umusekanyi», imigenzereze ye irangwa n’ubwirasi bukabije.

²⁵Umunebwe apfa yifuza, kuko amaboko ye yanga gukora.

²⁶Umugome yiriza umunsi wose ararikiye iby’abandi, naho intungane itanga ititangiriye itama.

²⁷Igitambo cy’abagome gitera ishozi Uhoraho, nkanswe iyo bagituranye ubuhemu.

²⁸Uhamya ibinyoma azarimbuka, ariko utega amatwi, azahabwa ijambo arihorane.

²⁹Umuntu w’umugome yerekana ko yigize, naho uw’intabera atsimbarara ku myifatire ye.

³⁰Nta buhanga, nta bwenge, nta n’inama y’umuntu yahangara Uhoraho.

³¹Ku munsi w’urugamba, ifarasi barayambika bakayitunganya, ariko Uhoraho ni we utanga gutsinda.