Read kinyarwanda Imigani 22 Bible Online

Imigani 22 - kinyarwanda bible

Imigani 22

¹Kuvugwa neza biruta ubukungu bwinshi, kubahwa bikaruta feza na zahabu.

²Umukire n’umukene bafite icyo bahuriyeho, bombi ni Uhoraho wabaremye.

³Umunyabwenge abona icyago kije, akihisha, naho injiji zikiyahuramo, zikabiryora.

⁴Uwicisha bugufi abisaruramo gutinya Uhoraho, ubukire, icyubahiro n’ubugingo.

⁵Inzira y’indyarya ibamo amahwa n’imitego, ushaka gukiza ubuzima bwe, arayirinda.

⁶Nutoza umwana muto inzira agomba gukurikira, naba n’umusaza ntazayiteshukaho.

⁷Umukire ategeka abakene, kandi uguza ahinduka umugaragu w’umugurije.

⁸Ubiba ubuhemu asarura ibyago, kandi azahazwa n’ingaruka z’ubugome bwe.

⁹Ufite ijisho rirebana impuhwe azahabwa umugisha, kuko agabanya ku mugati we, agaha umukene.

¹⁰Niwamagana umusekanyi, intonganya zizashira, imanza n’agasuzuguro bihoshe.

¹¹Ukunda imitima iboneye akarangwa n’ineza ku munwa, aba ari incuti y’umwami.

¹²Amaso y’Uhoraho arengera ubumenyi, kandi agatahura amagambo y’abagambanyi.

¹³Umunebwe aravuga ngo «Hanze hari intare[31], ninsohoka irantsinda mu mayira.»

¹⁴Akanwa k’umugore w’undi ni nk’urwobo rurerure, uwo Uhoraho azinutswe, azagwamo.

¹⁵Ubusazi buba buziritse ku mutima w’umwana muto, ariko inkoni ihana ibumucaho.

¹⁶Ukandamiza umukene agezaho akamukuza[32], kandi uha umukire aba amukenesheje.

¹⁷Tega amatwi, wumve amagambo y’abanyabuhanga, umutima wawe uwuhatire ubumenyi bwanjye,

¹⁸kuko uzanezezwa no kuyabika mu mutima wawe, no kuyahoza ku munwa wawe yose.

¹⁹Kugira ngo wiringire Uhoraho, nawe, ubu ngiye kukwigisha.

²⁰Ese si wowe nandikiye igitabo kigizwe n’imitwe mirongo itatu[33], kirimo inama n’ubumenyi,

²¹ngira ngo nkumenyeshe amagambo y’ukuri, bityo nawe ukayageza yose ku wagutumye?

²²Ntuzambure umukene kuko ari umukene, ntuzahutarize ku rugi[34] utishoboye,

²³kuko Uhoraho azababuranira, akica ababakandamiza.

²⁴Ntugacudike n’umunyamujinya, kandi ntukagendane n’umuntu warakaye,

²⁵utazavaho utora inzira ze, ubugingo bwawe bugafatirwa mu mutego.

²⁶Ntukagenze nk’abemararira abandi, bakishingira abarimo imyenda;

²⁷ntuzi se ko ubuze icyo wishyura, bagutwara n’uburiri uryamyeho[35]?

²⁸Ntuzimure imbago ya kera, iyo abasokuru bawe bashinze.

²⁹Uwo ajye yiyereka abami, yoye kuguma muri rubanda rugufi.