Read kinyarwanda Imigani 23 Bible Online

Imigani 23 - kinyarwanda bible

Imigani 23

¹Niwicara ugiye gusangira n’igikomerezwa, uzitondere ibiri imbere yawe;

²uzirinde kugira umururumba, niba uzi ko ufite inda nini.

³Ntuzararikire ibiryo bye biryoshye, kuko ari ibishukisho.

⁴Ntuzirushye ngo urashaka ubukire, uzirinde ndetse no kubutekereza;

⁵umara kubura amaso ubureba, ugasanga bwayoyotse, kuko wagira ngo bumera amababa, maze bukaboneza iy’ikirere nka kagoma.

⁶Ntuzarye umugati w’umuntu ukureba nabi, kandi ntuzararikire ibiryo bye biryoshye,

⁷kuko icyo atekereza ku mutima ari na ko agikora; arakubwira ati «Rya kandi unywe», ariko ntaba agushyizeho umutima!

⁸Ibyo umaze kumira uzabiruka n’amagambo yawe meza agupfane ubusa.

⁹Ntuzabwire amatwi y’igicucu, kuko cyasuzugura ukuri kw’amagambo yawe.

¹⁰Ntukimure imbago ya kera, ngo urengere umurima w’imfubyi,

¹¹kuko zifite umuhozi ukomeye; ni we uzaziburanira akurwanye.

¹²Umutima wawe uwukangurire inyigisho, n’amatwi yawe uyatoze amagambo y’ubumenyi.

¹³Ntukange guhana umwana, numukubita umunyafu, ntazaherako ngo apfe!

¹⁴Wowe rero, numukubita umunyafu, ubuzima bwe uzaba ubukijije inyenga[36].

¹⁵Mwana wanjye, umutima wawe nurangwaho ubuhanga, nanjye uwanjye uzishima,

¹⁶kandi nzanezerwa cyane, umunwa wawe nuvuga amagambo aboneye.

¹⁷Umutima wawe ntukagirire ishyari abanyabyaha, ahubwo ujye uhora utinya Uhoraho,

¹⁸kuko bucyana ayandi, hakazaza igihe uzabona ko icyizere cyawe atari imfabusa.

¹⁹Tega amatwi, mwana wanjye, ube umunyabuhanga, kandi umutima wawe uwuyobore inzira iboneye.

²⁰Ntuzabarirwe mu banywi ba divayi, cyangwa mu bashimusi,

²¹kuko abanywi n’abashimusi batindahara, naho kuryamira bikambika umuntu incabari.

²²Uzajye wumvira so wakubyaye, kandi ntugasuzugure nyoko namara gukecura.

²³Ujye uharanira ukuri, woye kugutezukaho, uronke ubuhanga, ubumenyi n’ubwenge.

²⁴Se w’intungane ntazahwema kwishima, kandi ubyaye umunyabuhanga aranyurwa.

²⁵So na nyoko nibanezerwe, uwakubyaye avuze impundu.

²⁶Mwana wanjye, wite ku byo nkubwira, kandi amaso yawe anyurwe n’inzira zanjye:

²⁷ni koko, umugore w’indaya ameze nk’urwobo rurerure, naho uw’umuvantara ni nk’iriba ry’imfungane;

²⁸ng’uwo ararekereje nk’umujura, abantu akabagwizamo abagambanyi.

²⁹Ni nde uhora ataka? Ni nde uhora yicuza icyo yakoze? Ni nde nyir’intonganya? Ni nde nyir’amaganya? Ni nde nyir’inguma zitagira imvano? Ni nde nyir’amaso yatukuye?

³⁰Ni iby’abarara inkera kuri divayi bagahora bashakisha inzoga z’amuki.

³¹Uramenye ntukarebe divayi; usanga ari intuku, ibengerana mu nkongoro, ikamanuka inzira imwe mu muhogo,

³²ariko amaherezo ikaryana nk’inzoka, ikadomana nk’impiri.

³³Amaso yawe azabona ibintu by’amayobera, uvuge amagambo y’urudubi;

³⁴umere nk’umuntu uryamye mu mazi magari, cyangwa mu bushorishori bw’ibiti!

³⁵Uzavuga uti «Bankubise, ariko sindibwa, bampondaguye, ariko nta cyo numva! Mbese nzakanguka ryari? Ay’ubusa nzongera nyivumbe!»