Read kinyarwanda Imigani 25 Bible Online

Imigani 25 - kinyarwanda bible

Imigani 25

¹Dore indi migani ya Salomoni, uko yakusanijwe n’abantu ba Hezekiya, umwami wa Yuda[40].

²Ikuzo ry’Imana ni ukugira ibanga, naho iry’abami ni ugucengera ibintu.

³Uko nta we uzi ubujyejuru bw’ikirere n’ubujyakuzimu bw’isi, ni na ko imitima y’abami idashobora gusesengurwa.

⁴Iyo feza uyikijije ibishunga, iza iyunguruye neza;

⁵nukura umugome imbere y’umwami, ingoma ye izaganzamo ubutabera.

⁶Ntukibonekeze imbere y’umwami, cyangwa ngo ufate icyicaro cy’abakomeye,

⁷kuko byaruta ko bakubwira ngo «Tambuka uze hano[41]», aho gusuzugurirwa imbere y’igikomangoma.

⁸Ibyo amaso yawe yabonye, ntukihutire kubijyana mu rubanza; none se amaherezo wabigenza ute, mugenzi wawe aramutse agutsinze?

⁹Uzajye uburana na mugenzi wawe, ariko wirinde kugira uwo umenera ibanga,

¹⁰hato batazabimenya bakakugaya, maze ugata agaciro burundu.

¹¹Ijambo rivugiwe igihe, ni nk’ikirezi cya zahabu gitakishije feza.

¹²Inama umunyabuhanga agira umwumva, ni nk’impeta cyangwa umutamirizo bikoze muri zahabu.

¹³Nk’uko amafu yo mu mpeshyi ashimisha abasaruzi, ni ko intumwa y’indahemuka imeze; koko rero, isusurutsa umutima wa shebuja.

¹⁴Umuntu uhora asezerana ntagire icyo atanga, asa n’ibicu n’umuyaga bitavamo imvura.

¹⁵Kutarambirwa bituma umuntu yigarurira umucamanza, kandi ururimi rucisha make ruvuna igufa[42].

¹⁶Ese ufite ubuki? Uryeho ubuguhagije, nurenza urugero, uzaburuka.

¹⁷Uzajye usura mugenzi wawe rimwe na rimwe, kuko nakurambirwa, azakwanga.

¹⁸Umuntu ushinja ibinyoma mugenzi we, amubabaza nk’ubuhiri, inkota cyangwa umwambi utyaye.

¹⁹Kwiringira umugambanyi amakuba yaje, ni nko kwizera iryinyo ryaboze cyangwa ikirenge gicumbagira.

²⁰Kuririmbira umuntu wishavuriye, ni nko gusuka siki ku gisebe, cyangwa kwiyambura ikoti mu mbeho.

²¹Niba umwanzi wawe ashonje, muhe umugati wo kurya, niba afite inyota, umuhe amazi anywe;

²²ubwo uzaba usa n’umurahurira ibishirira ku mutwe[43], kandi Uhoraho azabikwitura.

²³Uko umuyaga wo mu majyaruguru uzana imvura, ni na ko akarimi kazimura gatera abantu ishavu.

²⁴Biraruta kwinugika mu ngombe iri mu rugo, aho kubana mu nzu n’umugore w’umunyamahane.

²⁵Inkuru nziza iturutse mu gihugu cya kure, isa n’amazi afutse mu muhogo wakakaye.

²⁶Intungane idohoka kubera umugome, ni nk’iriba ry’ibirohwa cyangwa isoko banduje.

²⁷Si byiza kurya ubuki bwinshi, cyangwa guharanira ikuzo rihanitse.

²⁸Umuntu utitangira muri kamere ye, ameze nk’umugi wasenyutse utagira inkike.