Read kinyarwanda Imigani 28 Bible Online

Imigani 28 - kinyarwanda bible

Imigani 28

¹Umugome ahunga nta we umwirukanye, ariko intungane ni nk’icyana cy’intare, nta cyo zikanga.

²Iyo igihugu kivumbagatanyije, abategetsi baba benshi, ariko umuntu w’umuhanga kandi uzi ubwenge aragicubya.

³Umukene ukandamiza abanyantege nke, ni nk’imvura y’umuriri igwa, abantu bakabura ikibatunga.

⁴Abica amategeko bogagiza umugiranabi, naho abayakurikiza, bakamurakarira.

⁵Inkozi z’ibibi ntizumva ubutabera, ariko abashaka Uhoraho bumva byose.

⁶Umukene urangwa n’umurava aruta umukire uzwiho uburyarya.

⁷Ukurikiza itegeko aba ari umwana uzi ubwenge, naho uwuzura n’ibyomanzi akoza se ikimwaro.

⁸Uwongera umutungo we yaka inyungu z’agakabyo, aba awurundira undi uzagirira impuhwe abakene.

⁹Uwica amatwi ngo atumva itegeko, n’isengesho rye riba riteye ishozi.

¹⁰Uyobya intabera mu nzira mbi, azagwa mu rwobo yicukuriye ubwe, naho ab’intungane bazahirwa.

¹¹Umukire yibwira ko ari umunyabuhanga, ariko umukene uzi ubwenge akamutahura.

¹²Iyo intungane zanezerewe, biba ari ibirori, ariko iyo abagome bahagurutse, buri wese arahunga.

¹³Uhisha ibyaha bye, ntakizamuhira, ariko ubyanga akabyicuza, azababarirwa.

¹⁴Hahirwa umuntu uhora akenga, naho unangira umutima we azagwa mu makuba.

¹⁵Umutware mubi ukandamiza imbaga y’abanyantege nke, ni nk’intare itontoma cyangwa ikirura gishonje.

¹⁶Umutware utagira ubwenge akunda guhuguza, uwanga indamu mbi ni we uzaramba.

¹⁷Umuntu wahamwe n’amaraso y’uwo yishe azahunga arinde apfa, ntihazagire umutangira.

¹⁸Ugendana umurava azakizwa, indyarya yo inyura inzira ebyiri, imwe ikazayigwamo.

¹⁹Uhinga umurima we azabona ikimutunga ahage, naho ukurikirana amateshwa azatindahara.

²⁰Umuntu uvuga ukuri azahundagazwaho imigisha, naho uwihutira gukira azahanwa.

²¹Nta bwo ari byiza kubera umuntu mu rubanza, ariko hari abacumura batyo kubera igisate cy’umugati.

²²Umuntu ararikira yiruka inyuma y’ubukire, ariko ntamenye ko ari ubutindi bumutegereje.

²³Ucyaha abandi amaherezo aratoneshwa, kurusha ubarata agakabya.

²⁴Ucuza se na nyina akavuga ngo «Si icyaha», nta ho atandukaniye n’umujura.

²⁵Umunyamururumba abyutsa intonganya, ariko uwiringira Uhoraho azatengamara.

²⁶Uwiringira ubwenge bwe gusa, aba ari umupfayongo, naho uwitwarana ubuhanga, nta kizamuhungabanya.

²⁷Uha abakene ntazigera akena, ariko utabareba azavumwa cyane.

²⁸Iyo abagome bahagurutse, buri wese arihisha, ariko iyo barimbutse, intungane ziragwira.