Read kinyarwanda Imigani 30 Bible Online

Imigani 30 - kinyarwanda bible

Imigani 30

¹Amagambo ya Aguri, mwene Yake, w’i Masa[47]. Uwo muntu ni we wivugiye ati Mana yanjye, ndananiwe! Ndananiwe, Mana yanjye, ndarushye.

²Koko rero, nta muntu undusha ubucucu[48], kandi nta bwenge bw’abantu ngira;

³sinatojwe ubuhanga, n’ubumenyi bwa Nyir’ubutungane simbuzi.

⁴Ni nde wazamutse mu ijuru akagaruka? Ni nde wapfumbase umuyaga mu biganza bye? Ni nde wapfunyitse amazi mu gishura cye? Ni nde washinze imbago z’isi? Izina rye ni irihe kandi umuhungu we yitwa nde? Wowe uramuzi!

⁵Ijambo ry’Uhoraho rikwiye kwizerwa, umwiringiye rimubera ingabo imukingira.

⁶Ntuzagire icyo wongera ku magambo ye, hato atazaguhana, ugatahurwaho ikinyoma.

⁷Hari ibintu bibiri nkwisabiye, ntuzabinyime mbere y’uko mpfa:

⁸uzandinde ikinyoma n’uburyarya, undinde ubutindi cyangwa umurengwe, ahubwo ungenere ikintunga gihagije,

⁹ejo ntazarengwa ngahemuka, mvuga ngo «Uhoraho ni nde?» cyangwa natindahara nkiba, ngasuzuguza izina ry’Imana yanjye.

¹⁰Ntuzasebye umugaragu kuri shebuja, hato atazakuvuma bikakokama.

¹¹Hari ubwoko bw’abantu buvuma se, batigeze kwifuriza nyina umugisha;

¹²ubwoko bw’abantu bibwira ko ari abaziranenge, kandi batarahanaguweho ibicumuro byabo;

¹³ubwoko bw’abantu b’indoro y’ubwirasi, barangwa n’amaso y’agasuzuguro;

¹⁴ubwoko bw’abantu b’amenyo y’inkota n’urwasaya rw’icyuma, batanyagurisha abanyantege nke ku isi, n’abakene mu bantu.

¹⁵[49]Umusundwe ufite abakobwa babiri bawubwira ngo «Duhe, duhe[50]!» Hari ibintu bitatu by’indahaga, hakaba ndetse bine bitigera bivuga ngo «Ndanyuzwe!»

¹⁶Ibyo ni inyenga y’ikuzimu, inda y’ingumba, ubutaka budahaga amazi, ndetse n’umuriro utigera uvuga ngo «Ndanyuzwe!»

¹⁷Ijisho ry’umuntu useka se, akannyega ubukecuru bwa nyina, ibikona byo mu gasozi bizaritobagura, maze ibyana bya kagoma biriyongobeze.

¹⁸Hari ibintu bitatu bindenze, hakaba na bine ntazi:

¹⁹uko kagoma iguruka mu kirere, uko inzoka igenda ku rutare, uko ubwato bwoga mu mazi, n’ikiyobora umugabo ku mugore ukiri inkumi[51].

²⁰Dore uko imyifatire y’umugore w’umusambanyi imeze: ararya, akihanagura ku munwa, ubundi akavuga ati «Nta kibi nakoze!»

²¹Hari ibintu bitatu bihindisha isi umushyitsi, hakaba na bine idashobora kwihanganira.

²²Ni ibi: umucakara wimye ingoma, umupfayongo warenzwe ibiryo,

²³umugore usendwa akabona umugabo, n’umuja usubira mu kiryamo cya nyirabuja.

²⁴Hari ibintu bine birusha ibindi ubuto ku isi, ariko bikaba inyaryenge[52] mu zindi.

²⁵Ni intozi zitagira imbaraga, ariko ku mpeshyi zigahunika ibizazitunga;

²⁶n’impereryi na zo zitagira ingufu, ariko zigacukura indaro yazo mu rutare.

²⁷Hari n’inzige zitagira umwami, ariko zikagendera ku murongo uboneye;

²⁸hakaba n’umuserebanya bashobora gufatisha intoki, ariko ugatura mu ngoro z’umwami.

²⁹Hari n’ibindi bitatu bifite umubyimba unoze, hakaba na bine birangwa n’ingendo nziza:

³⁰hari intare y’intwari mu nyamaswa, kandi ntigire icyo ihunga kibaho;

³¹hari rusake igenda ishinjagira, cyangwa se ruhaya; hakaba n’umwami iyo ashoreye ingabo ze.

³²Niba warigannye umupfayongo, wowe ubwawe ukikuza, nubitekerezaho, uzahite ufunga umunwa wawe;

³³kuko iyo ucunze amata abyara amavuta, wakanda izuru rikava amaraso, kandi wasembura umujinya ukabyara intonganya.