Read kinyarwanda Imigani 31 Bible Online

Imigani 31 - kinyarwanda bible

Imigani 31

¹Ngaya amagambo Lemuweli[53], umwami wa Masa, yatojwe na nyina:

²Umva, mwana wanjye, mwana nibyariye! Nkubwire iki se, mwana namye nsaba Imana?

³Ntuzategeze ubusore bwawe abagore, cyangwa ngo wishinge indaya zoreka n’abami.

⁴Lemuweli we, dore ibitabereye abami: abami ntibakwiye kunywa divayi, n’ibikomangoma ngo birarikire inzoga zihiye,

⁵kugira ngo batanywa bakibagirwa ibyategetswe, maze bakaburizamo imanza z’abakene bose.

⁶Inzoga ihiye, mujye muyiha uri burimbuke, divayi na yo muyihe ufite intimba ku mutima;

⁷bityo azanywa yibagirwe amagorwa ye, yoye kwibuka umuruho we!

⁸Ujye uvuganira ikiragi, wite ku batagira kivurira,

⁹wature, uce imanza mu butungane, maze usubize abakene n’abatishoboye uburenganzira bwabo.

¹⁰[54]Umugore w’umutima[55] azabonwa na nde[56]? Ko asumbije agaciro amasaro meza!

¹¹Umugabo we amwiringira abikuye ku mutima, maze agakunda agatunganirwa.

¹²Uwo mugore aramunezereza, na rimwe ntajya amutenguha, iminsi yose y’ubuzima bwe.

¹³Ashakashaka ubudodo n’ubuhivu bworoshye, maze intoki ze zigashishikarira kuboha.

¹⁴Amera nk’amato y’abacuruzi, ibimutunga akabikura kure.

¹⁵Abyuka kare butaracya, agateganya ifunguro ry’abo mu rugo, akabona gukwiza imirimo mu baja.

¹⁶Yaba abonye umurima umushimishije akawugura, akawuteramo imizabitu ibyawe n’urwunguko rw’imirimo ye.

¹⁷Arakenyera agakomeza, ahasigaye agakora atikoresheje.

¹⁸N’ubwo abona ibintu bye bigenda neza, na nijoro itara rye riba ryaka akora.

¹⁹Ikiganza cye agicyamurira ku rubohero, maze intoki ze zigasingira ikizingo cy’ubudodo.

²⁰Amaboko ye ayaramburira abakene, akagirira ubuntu ababuraniwe.

²¹Ntajya yikanga imbeho y’itumba, kuko abo mu nzu ye bose bambaye ibisusurutse.

²²Ubwe yibohera ibiringiti, umwambaro we ni hariri inoze y’umuhemba.

²³Umugabo we yubahwa mu nama y’abakuru, iyo yicaranye n’abasheshe akanguhe b’ako karere.

²⁴Aboha imyenda akayigurisha, n’umucuruzi uhita akamuguraho imikandara.

²⁵Umwete n’umurava ni byo bimuranga, maze ibihe bizaza akabirebana agatwenge.

²⁶Agira ubwitonzi iyo ajya kuvuga, agatanga inama zuje urugwiro.

²⁷Akurikirira hafi iby’urugo rwe, maze ntakunde kwicara nta cyo akora.

²⁸Abahungu be burabahagurutsa bakamushima, umugabo we akamuvuga ibigwi.

²⁹Ati «Hari abakobwa benshi bagize ubutwari, ariko wowe wabarushije bose!»

³⁰Ikimero kirashukana n’uburanga bugashonga, ahubwo umugore utinya Uhoraho ni we ukwiye kuratwa.

³¹Mujye mumwegurira ibyavuye mu kuboko kwe, kandi aratirwe mu ruhame ibyo yakoze!