Read kinyarwanda Imigani 4 Bible Online

Imigani 4 - kinyarwanda bible

Imigani 4

¹Bana, nimwumve inyigisho y’umubyeyi, mwihatire kumenya ubwenge icyo ari cyo.

²Ni koko, inyigisho nabahaye ni ingirakamaro: ntimuzarenge ku byo nabatoje.

³Nanjye, data namubereye umwana mwiza, naho mama yankundaga nk’umuhungu w’ikinege.

⁴Nuko data akanyigisha, agira ati «Umutima wawe ujye wibuka amagambo yanjye, ukurikize amabwiriza yanjye, maze bizakuviremo kubaho.

⁵Jya wunguka ubuhanga, wunguke ubwenge; ntukabyirengagize, ngo uce ukubiri n’amagambo yanjye.

⁶Ntuzatatire ubuhanga, buzakuragira; uzabukunde, buzakurinda.

⁷Ujye ushakashaka ubuhanga: ni byo ntangiriro yabwo. Ujye ushakashaka ubwenge wifashishije ibyo utunze byose!

⁸Uzabupfumbate, buzagukuza; nubuhobera buzaguhesha icyubahiro.

⁹Buzakwambika umutamirizo w’ineza ku mutwe, bukwambike ikamba ry’ikuzo.»

¹⁰Mwana wanjye, tega amatwi, wakire amagambo yanjye, bizaguha kuramba umare imyaka myinshi.

¹¹Nakuyoboye mu nzira y’ubuhanga, ngutoza inzira y’ukuri.

¹²Nta kizakubogamira mu rugendo rwawe, kandi niwiruka ntuzatsikira.

¹³Uzatsimbarare ku burere bwawe, ntuzabute, ahubwo uzabukomeze, kuko ari bwo buzima bwawe!

¹⁴Ntuzakurikire inzira y’abagome, cyangwa ngo uce mu nzira y’abagizi ba nabi.

¹⁵Uzahirinde, ntuzahanyure! Uzabyihunze uboneze ahandi!

¹⁶Kuko bo batajya basinzira, batabanje gukora ikibi, ntibagoheka batagize uwo bagusha.

¹⁷Koko rero umugati barya ni umwibano, na divayi banywa bayikesha urugomo.

¹⁸Inzira y’intungane yo, ni nk’umuseke ukebye ugatangaza kugeza ku manywa y’ihangu;

¹⁹naho inzira y’abagome ni nk’umwijima, ntibaba bazi icyo bari butsikireho.

²⁰Mwana wanjye, witondere amagambo yanjye, utege amatwi ibyo nkubwiye!

²¹Ntibizakujye kure y’amaso, uzabibike mu mutima wawe,

²²kuko ubizirikanye, bimubera ubugingo kandi bikamukomeza.

²³Cyane cyane uzahore urinze umutima wawe, kuko ari wo ubuzima bushingiyeho.

²⁴Uzamagane amagambo y’ubugome, ugendere kure imvugo isebanya.

²⁵Jya ureba imbere yawe, ugende uromboreje inzira imwe.

²⁶Shakira ibirenge byawe aho binyura, kandi inzira zawe zihore ziboneye.

²⁷Ntukayobagurike hirya no hino, ibirenge byawe ujye ubihungisha ikibi.