Read kinyarwanda Imigani 6 Bible Online

Imigani 6 - kinyarwanda bible

Imigani 6

¹Mwana wanjye, niba warishingiye mugenzi wawe, hakaba hari n’undi mwagiranye amasezerano,

²niba rero waraguye mu mutego biturutse ku magambo y’akanwa kawe, n’imvugo yawe bwite ikaba ari yo ikuboshye,

³dore uko uzagenza, mwana wanjye, kugira ngo wigobotore. Kubera ko mugenzi wawe yakwigaruriye, genda umwinginge, umuguyaguye.

⁴Uramenye ntuzasinzire cyangwa ngo urushye ugoheka;

⁵ugomba kwibohora mu mutego, nk’uko isha cyangwa inyoni zigobotora iyo zatezwe.

⁶Wowe w’umunebwe, sanga urutozi! Uzitegereze imigenzereze yarwo, uzahungukira ubwenge.

⁷Nta we urugenzura, ntirugira umukoresha cyangwa umutware.

⁸Mu mpeshyi rwishakira ibizarutunga, naho ku mwero rugahunika ibiryo byarwo.

⁹Wowe w’umunebwe, uzaryamira kugeza ryari? Uzabaduka mu bitotsi byawe ryari?

¹⁰Uti «Henga nsinzire gato, ngoheke gato, nirambike gato, mbe nipfumbase!»

¹¹Ngaha rero ubukene bwagutungura nk’igisambo, n’ubwinazi bukakugwa gitumo nk’igisumizi.

¹²Umuntu w’imbunzamunwa aba ari ikiburaburyo n’inkozi y’ibibi!

¹³Agenda yica ijisho, akavugisha ibirenge, agaca amarenga akoresheje intoki.

¹⁴Ubutindi bumwarika ku mutima, agahorana imigambi y’ubugome, kandi aba ari gashozantambara.

¹⁵Ni yo mpamvu amakuba azamugwa gitumo, akenyagurike ibi bitagira urwungo.

¹⁶Hari ibintu bitandatu Uhoraho yanga, hakaba na birindwi[12] bimutera ishozi. Ni ibi:

¹⁷amaso y’agasuzuguro, akarimi kabeshya, ibiganza bimena amaraso y’umwere,

¹⁸umutima wiga imigambi y’ubugome, intambwe zikatarije ikibi,

¹⁹uwo batanzeho umugabo, akemeza ibinyoma, n’uwigira gashozantambara mu bavandimwe.

²⁰Mwana wanjye, uzakurikize amategeko ya so, kandi woye guhinyura inyigisho za nyoko.

²¹Uzabikomeze ku mutima igihe cyose, kandi uhore ubyiziritse ku ijosi.

²²Aho uzajya hose bizakuyobore, bibe hafi y’uburiri bwawe bikubikire, maze abe ari byo utekereza ukangutse.

²³Koko rero, itegeko ni itara, naho inyigisho ikaba urumuri. Inama z’uburere bwiza ni inzira y’ubuzima,

²⁴ni zo zizakurinda umugore w’inkozi y’ibibi, n’akarimi gasize umunyu k’umuvantara.

²⁵Ntuzararikire uburanga bwe mu mutima wawe, kandi ntuzemere ko akwicira ijisho,

²⁶kuko umugore w’indaya aba yishakira igisate cy’umugati, naho uwashyingiwe, iyo musambana, ashobora kukwicira ubuzima.

²⁷Umuntu yakwirahuriraho umuriro ate, maze imyenda ye ntishye?

²⁸Naho se uwagenda hejuru y’amakara agurumana, ibirenge bye byareka gushya bite?

²⁹Nguko uko bigendekera ushigukira umugore wa mugenzi we: uzamujyaho wese, ntazamuvaho amahoro.

³⁰Igisambo kibira ko gishonje, kugira ngo cyuzuze igifu cyacyo kirimo ubusa, ibyo ntikibigayirwa.

³¹Nyamara ariko iyo gifashwe, gisubiza ibyo cyibye incuro ndwi, kigatanga ibyo gifite mu nzu byose.

³²Naho usambanya umugore w’undi aba ari umusazi; amukomoraho intandaro y’urupfu.

³³Bimukururira inkoni n’ibitutsi, kandi ikimwaro cye ntigihanagurika.

³⁴Koko rero, gufuha bizatera umugabo umujinya mwinshi, yoye kuzagira impuhwe mu gihe cyo kwihorera.

³⁵Nta ndishyi ibaho azemera; nta yo azakira n’iyo wamuhongera ibya mirenge.