Read kinyarwanda Imigani 8 Bible Online

Imigani 8 - kinyarwanda bible

Imigani 8

¹Mbese ubuhanga ntibutera hejuru[14]? Mbese ubwenge ntiburangurura ijwi ?

²Buhagarara mu mpinga ndende y’imisozi iruhande rw’umuhanda, bugahamagarira mu mayira abiri,

³hafi y’imiryango binjiriramo bajya mu mugi, bugira buti

⁴«Bantu mwese, ni mwe mpamagara! Ijwi ryanjye rirabwira bene muntu!

⁵Ab’ibicucu, nimumenye kwitonda; abapfayongo, mumenye ubwenge.

⁶Nimutege amatwi, ibyo mbabwira ni ingirakamaro, kandi iminwa yanjye ivuga ukuri.

⁷Ni koko, umunwa wanjye uvuga ukuri gusa, ubugome buwutera ishozi.

⁸Amagambo yanjye yose araboneye, ntarangwamo igitotsi cy’uburyarya n’ubugome.

⁹Uzi kumva wese asanga ari amanyakuri, kandi yorohera uwajijukiwe n’ubumenyi.

¹⁰Nimufate ibyo mbatoza, aho guharanira feza; muhitemo ubumenyi aho gushaka zahabu iyunguruye.»

¹¹Koko rero, ubuhanga busumbye amasaro y’igiciro, kandi mu byo umuntu yifuza, nta na kimwe bihwanye.

¹²Jyewe ubuhanga, indaro yanjye ni ubwitonzi, nkagira n’ubwenge bwo gushishoza.

¹³Kubaha Uhoraho, ni ukwanga ikibi. Nanga ubwirasi, agasuzuguro, imyifatire mibi n’umunwa wuzuye ubugome.

¹⁴Ndangwa n’inama n’ubushishozi, ndi ubwenge, mfite n’ububasha.

¹⁵Ni jye wimika abami, n’ibikomerezwa nkabiha guca amateka aboneye.

¹⁶Abategetsi ni jye bakesha gutwara, n’ibikomangoma nkabiha guca imanza zitabera.

¹⁷Jyewe nkunda abankunda, kandi abanshaka bose barambona.

¹⁸Iwanjye haba ubukire n’ikuzo, ubukungu budashira n’ubutabera.

¹⁹Imbuto yanjye iruta kure zahabu iyunguruye, kandi umusaruro wanjye usumbye kure feza y’igiciro.

²⁰Ngendera mu nzira y’ubutabera, no mu nzira y’ubutungane,

²¹kugira ngo nkungahaze abankunda kandi ngo nuzuze ibigega byabo.

²²Uhoraho ni jye yahereyeho arema[15], mbanziriza ibindi yahanze byose.

²³Nimitswe kuva kera na kare, kuva mu ntangiriro, mbere y’uko isi ibaho.

²⁴Igihe amazi magari yari atarabaho, n’amasoko adudubiza atararemwa, jyewe nari naravutse.

²⁵Igihe imisozi n’utununga byari bitarashingwa, jyewe nari naravutse.

²⁶Nariho mbere y’uko arema isi, hamwe n’ubutaka n’ibiyigize byose.

²⁷Igihe yahangaga ijuru agaca uruziga rw’ikirere hejuru y’amazi magari, nari mpari.

²⁸Igihe yakoranyaga ibicu byo mu kirere, n’amasoko yo mu nsi y’isi akuzura amazi,

²⁹igihe yategekaga inyanja kutarenga inkombe yayo, akanatera imbago z’urugabaniro rw’isi,

³⁰ubwo nari iruhande rwe nk’umwana ukunzwe, ngahora mushimisha buri munsi, simpweme kumukina imbere,

³¹no kwisanzura ku isi ye, kandi nezezwa no kuba mu bantu.

³²None rero, bana banjye, muntege amatwi. Hahirwa abakurikira inzira zanjye!

³³Nimwumve inyigisho, muce akenge, mwoye kuyirengagiza.

³⁴Hahirwa umuntu untega amatwi, akaguma ku muryango wanjye, agahora ari maso imbere y’inzu yanjye!

³⁵Koko rero, uwambonye aba yabonye ubuzima, aba yaronse ubutoni kuri Uhoraho.

³⁶Naho uncumuyeho aba yibabaje ubwe, abanyanga bose baba bakunda urupfu.»