Read kinyarwanda Umubwiriza 12 Bible Online

Umubwiriza 12 - kinyarwanda bible

Umubwiriza 12

¹Uzibuke Uwakuremye mu gihe cy’ubuto bwawe, mbere y’uko usatirwa n’ibihe bibi, n’imyaka uzavugiraho uti «Iyi yo nta shema inteye.»

²Uzamwibuke mbere y’uko urumuri rw’izuba, ukwezi n’inyenyeri rukuzimiraho, n’ibicu bikongera kubudika imvura ihitutse.

³Icyo gihe amaboko yakurwanagaho azaba atitira, intugu wikorezaga zihetame, amenyo wari usigaranye ananirwe gutapfuna, n’amaso warebeshaga ahume.

⁴Icyo gihe amatwi yawe ntazaba acyumva, ijwi ryawe rizatitimira, uzabura ibitotsi mu bunyoni, utanagiheruka indirimbo z’ibitaramo.

⁵Ubwo ntuzaba ugiterera umusozi, nugera mu nzira uzazengerezwa, umutwe wawe uzabe uruyenzi, nk’igiti kirabije, amaguru yawe ananirwe kwiterura, kuko nta kabaraga uzaba usigaranye, ahubwo uzagenda ugana indaro y’ikuzimu, maze abategereje kukuririra bahore mu muharuro.

⁶Ubwo ni mbere y’uko unogoka, ubwonko butarasandara, ngo igifu gitabuke, n’umutima uturike,

⁷maze umukungugu usubire mu gitaka wavuyemo, n’umwuka w’ubugingo usubire ku Mana yawutanze.

⁸Koko Koheleti yarabivuze ati «Ibintu ni ubusa, ni ubusabusa koko, byose ni ubusa.»

⁹Uretse ko Koheleti yari umunyabuhanga, yatoje na rubanda ubumenyi; yarashishoje, aracengera, anonosora imigani myinshi.

¹⁰Koheleti yihatiye gushaka imvugo iboneye, no kwandika amagambo y’ukuri.

¹¹Imvugo y’abanyabuhanga ni nk’agashinge gatuma umuntu yinyakura, naho imigani ni nk’imisumari ifatanya ubumenyi bwose. Byose bibwirizwa n’Imana, yo mushumba umwe rukumbi w’ukuri.

¹²Ikindi kandi, mwana wanjye, umenye ko kwandika ibitabo byinshi bitajya birangira, kandi ko no kwiga cyane ugakabya binaniza umubiri.

¹³Umwanzuro: muri make rero, ujye utinya Imana kandi ukurikize amategeko yayo; ni cyo umuntu abereyeho.

¹⁴Koko rero, Imana izahamagaza ikiremwa cyose, igicire urubanza ku byihishe byose, ari ibyiza ari n’ibibi.