Read kinyarwanda Umubwiriza 3 Bible Online

Umubwiriza 3 - kinyarwanda bible

Umubwiriza 3

¹Ku isi, buri kintu kigira umwanya wacyo n’igihe cyacyo:

²Hari igihe cyo kubyara, n’igihe cyo gupfa; hari igihe cyo gutera urugemwe, n’igihe cyo kururandura;

³hari igihe cyo kwica, n’igihe cyo gukiza; hari igihe cyo gusenya, n’igihe cyo kubaka;

⁴hari igihe cyo kurira, n’igihe cyo guseka; hari igihe cyo kuganya, n’igihe cyo kubyina;

⁵hari igihe cyo gutera amabuye, n’igihe cyo kuyatora; hari igihe cyo guhoberana, n’igihe cyo kwirinda guhoberana;

⁶hari igihe cyo gushakisha, n’igihe cyo gutakaza; hari igihe cyo kubika, n’igihe cyo kujugunya;

⁷hari igihe cyo gutabura, n’igihe cyo kudoda; hari igihe cyo guceceka, n’igihe cyo kuvuga;

⁸hari igihe cyo gukunda, n’igihe cyo kwanga; hari igihe cyo cy’intambara, n’igihe cy’amahoro.

⁹Inyungu y’umuntu ukora yiyuha akuya ni iyihe?

¹⁰Nitegereje umurimo Imana yahaye bene muntu ngo bawusohoze.

¹¹Nasanze ibyo yaremye byose biberanye n’igihe cyabyo; yahaye abantu kumenya ibyahise n’ibizaza, ariko badashobora gusesengura ibikorwa by’Imana byose uko bingana.

¹²Nasanze ibyiza kuri bo ari ukwishimisha, bakishakira umunezero bakiriho.

¹³Koko kandi, iyo umuntu ariye, akanywa, agashimishwa n’ihirwe yavunikiye, na byo ni ingabire y’Imana.

¹⁴Nasanze ibikorwa by’Imana biramba ubuziraherezo, nta kigomba kongerwaho, habe ngo hari n’icyo wagabanyaho. Imana ikora ityo kugira ngo bayitinye.

¹⁵Ibiriho ubu, na mbere byariho, n’ibizabaho bizaba byarahozeho; Imana ihora igarura ibyahozeho.

¹⁶Dore ibindi nabonye ku isi: ubugome bwahawe intebe aho bacira imanza, n’umubisha yimura intungane mu cyicaro.

¹⁷Naribwiye mu mutima nti «Intungane n’umugome, Imana izabacira urubanza, kuko ikintu cyose gifite igihe cyacyo, n’igikorwa cyose kikazacirwa urubanza rugikwiye.»

¹⁸Mu mutima wanjye, dore icyo navuze ku bantu: Imana ishaka kubagerageza, bityo ikabumvisha ko na bo ubwabo ari ibikoko.

¹⁹Koko rero, amaherezo y’abantu n’ay’ibikoko ni amwe: urupfu ni rumwe, impumeko ni imwe, kandi umuntu nta cyo asumbya igikoko, kuko byose ari ubusabusa.

²⁰Ibintu byose bijya hamwe, byose biva mu gitaka, byose bisubira mu gitaka.

²¹Ni nde uzi niba umwuka w’abantu uzamuka ujya ejuru[9], maze uw’ibikoko ukajya hasi ikuzimu?

²²Ubwo nabonye ko icyiza ku muntu ari ukunezezwa n’ibikorwa bye, kuko ari wo mugabane we. Napfa se, ni nde uzamugarura kureba ibyo asize?