Read kinyarwanda Umubwiriza 6 Bible Online

Umubwiriza 6 - kinyarwanda bible

Umubwiriza 6

¹Hari ikindi kibabaje nabonye ku isi, kandi gikomereye umuntu.

²Umuntu Imana yamugabiye umukiro, ibintu n’icyubahiro ; ntiyagira icyo abura mu byo umutima we wifuzaga byose. Nyamara ariko Imana ntimureka ngo abirye, ahubwo biribwa n’undi w’umuvantara! Ibyo na byo ni ukugokera ubusa, bikaba n’ibyago bibi.

³Nk’umuntu wabyara abana ijana, akaramba akabaho imyaka myinshi, umutima we ntunezerwe muri icyo gihe cyose, yaba apfuye akabura gihamba, ibyo byose byaba byaramumariye iki ? Ndemeza ko umwana upfuye akivuka aba amurusha ibyishimo.

⁴Koko rero, uwo mwana aba avuye mu mwijima, kandi aba agiye mu mwijima, n’izina rye rigahita risibangana.

⁵Nta n’ubwo aba yabonye izuba cyangwa ngo arimenye, bityo akaba arusha ituze uwarambiye ubusa.

⁶Mbese ariko n’iyo yabaho imyaka ibihumbi bibiri atigeze asogongera ku munezero, harya bose ntibajya hamwe ?

⁷Imvune z’umuntu aziterwa n’inda ye, kandi ntijya ihaga na rimwe.

⁸None se icyo umunyabuhanga arusha umupfayongo ni iki ? Ni iyihe nyungu y’umukene uzi kwifata neza imbere y’abantu ?

⁹Ibyiza ni ugushimishwa n’ibyo ufite aho guhora urarikiye. Ibyo na byo ni ubusa, bikaba no kwiruka inyuma y’umuyaga.

¹⁰Ikiriho cyose kiba cyarahawe izina, tuzi n’umuntu icyo ari cyo, ko adashobora kujya impaka n’umurusha imbaraga.

¹¹Koko rero amagambo menshi yongera amazimwe ; umuntu se ayakuramo nyungu ki ?

¹²Mbese ni nde wamenyera muntu ikimutunganiye mu buzima bwe, ko iminsi ye itagira shinge ihita bwangu nk’igihu ? Ni nde se koko uzamuhishurira ibizaza nyuma ye amaze gupfa ?